Балыыһаҕа туттарар анаалыстарбыт түмүктэрэ ардыгар, кубулҕаттаах күн-дьыл курдук, сотору-сотору уларыйаллар. Дьиҥэр, тугуҥ да ыалдьыбат курдук сананаҕын. Холобур, СОЭ-ҥ үрдээн соһутар. Биллэрин курдук, СОЭ организмҥар туох эрэ уларыйыы тахсыбытын көрдөрөр.
edersaas.ru
Дьиҥэр, анаалыстар кырдьыктаах балаһыанньаны «кэпсииллэрэ» үксүгэр анаалыс туттарарга сөпкө бэлэмнэнэртэн тутулуктаах:
– Араас диета, эти-сиини эрчийии, стресс, бэл хаан туттарарга туттан олорор балаһыанньаҥ, эми-тому иһии, процедуралар ыарыһах туругун уларыталлар. Ол эбэтэр доруобуйаны чинчийии түмүктэригэр биллэрдик дьайаллар.
Анаалыстар түмүктэрэ төһө кыалларынан чахчылаах буолалларын туһугар маннык быраабылалары билэр туһалаах.
Хаан анаалыһа
– Хааҥҥын туттарыаҥ иннинэ эти-сиини ноҕуруускалыыртан, арыгыны уонна эми иһэртэн туттун. Киэһээҥҥи аһылык кэнниттэн эбии аһаама, сарсыарда анаалыс туттарыаҥ биир чаас иннинэ тура сатаа;
— Согу, чэйи, кофены уонна да атын утаҕы иһиллибэт. Ол оннугар гааһа суох көннөрү ууну иһиэххэ сөп;
— Уһуктан баран табахтаама уонна эккин-сииҥҥин эрчийимэ;
— Эмкин тохтотор кыаллыбат буоллаҕына, эмп иһэ сылдьарыҥ туһунан лабораҥҥа эт. Тоҕо диэтэххэ, сорох эмтэр анаалыс түмүктэригэр дьайаллар.
Глюкозотолерантнай тест
– Тест ыытыллыар диэри саатар 3 хонук устата диетаҕын уонна эми иһэргин (төһө кыалларынан) тохтот. Бу быраабылалары тутустаххына эрэ хаан анаалыһын түмүктэрэ кырдьыктаах буолалларын учуоттаа;
— Тест ыытыллыан 3 күн иннинэ күннээҕи аһылыккар углевод ахсаана 125 гыраамтан элбиэ суохтаах;
— 12 чаас устата тугу да сиэмэ (16 чаастан ордук кэмҥэ аччыктаама);
— Ууну эрэ иһиэххин сөп;
— 12 чаас устата эккин-сииҥҥин ноҕуруускалаама.
Ииги чинчиттэрии
—Түүҥҥү утуйуу кэннинээҕи иик ордук элбэх чахчыны биэрэр. Сарсыарда аан бастаан унитазка ииктии түһэн баран, иик иккис өлүүтүн анаалыска ылар ордук;
— Ииккэ араас ириҥэ түспэтин туһугар сарсыарда тураат да, ууһатар уорганнары душка мыыланан суун. Ииккин биир чаастан хойутаппакка лабораторияҕа туттара сатаа;
— «Зимницкэй» анаалыһын туттарарга аһылык эрэсиимэ уларыйбат, ол эрээри төһө ууну иһэргин учуоттууруҥ ордук;
— Кыыс, дьахтар ыйданар кэмигэр анаалыс туттарыллыбат;
— «Нечипоренко» анаалыһыгар иик ортоку өлүүтэ туттуллар.
Хойууну чинчиттэрии
— Эмтиир бырааһыҥ сүбэлээбит диетатын тутус;
— Эми, ол иһигэр битэмииннэри уонна БАД-ы, иһимэ.
Таһыгар көстүбэт (скрытай) хаан
– Хойууну туттарарга таска көстүбэт хааны чинчиттэриэх иннинэ кэккэ эмтэри, чуолаан аскорбиновай уонна ацетилсалициловай кислоталары, иһимэ. Ханнык эмтэри иһэргин-испэккин бырааскын кытары сүбэлэс. Кыах баар буоллаҕына, үс күн иннинэ эти, балыгы, помидоры, оҕурсуну, өҥнөөх хаппыыстаны, күөх оҕуруот аһын сиэмэ.
Сил
— Анаалыһы үчүгэйдик салгылатыллыбыт эбэтэр анал миэстэҕэ ылыллар;
— Аан бастаан хайаан да тиискин үчүгэйдик ыраастаа, айаххын уонна куолайгын оргуйбут уунан сайҕаа;
— Бу анаалыска аһылыккар уонна эмтэргэр ханнык да хааччахтааһын суох. Тыҥаттан сили ыларга ыарыһах хаста да дириҥник үөһээ-аллараа тыыныахтаах – тыынын тутан баран, эмискэ төттөрү таһаарыахтаах. Анаалыс туттарар контейнергар сыраан түстэҕинэ, силгин хаттаан ыл. Чинчиттэриэҥ үс күн иннинэ күөмэй ыраастыыр эмтэри иһиэххэ сөп.
Надежда ЕГОРОВА, «Саха сирэ» хаһыат, edersaas.ru