Анаалыһы уонна көмпүүтэр томографиятын быраас этиитинэн эрэ оҥоруохха диэн этии киирдэ
Олус элбэх оруна суох бырааска көрдөрүүлэр, мэдиссиинэ үлэһиттэрин онто да суох улахан ноҕуруускаларын өссө уустугурдар диэн РФ Доруобуйатын харыстабылын министиэристибэтэ этэр. Онон коронавируска анаалыһы уонна компьютер томографиятын быраас этиитинэн эрэ оҥоһулуннун диэн этии киллэрдэ.
edersaas.ru
Дойду сүрүн инфекциониһа Владимир Чуланов, ыалдьар түгэҥҥитигэр атын дьону сыһыарбат гына, дьиэҕитигэр олорон бырааскытыгар биллэрин диэн этэр. Быраас эбии чинчийии наада диэтэҕинэ бэйэтэ аныахтаах. ПЦР анаалыһы дьиэҕэ да ылыахха сөп. Оттон көмпүүтэр томографията ыараханнык ыалдьыбыт эрэ дьоҥҥо туттуллуохтаах диэн эттилэр.
Арассыыйа сүрүн пульмонолога Сергей Авдеев коронавирус бастакы сибикилэрэ көннөрү дьаҥ курдук саҕаланаллар диэн этэр. Онон, киһи этин сылааһа 37,5-тэн үөһээ, сэниэтэ суох буолуу, кураанах сөтөл барыта көннөрү тымныйыыга да буолуон сөп. Ыалдьыбыт дьон 30% аҕылыыллар, 20% төбөлөрө ыалдьар.
Коронавируһунан ыалдьан баран үтүөрбүт дьон атыттарга уон күн иһигэр, сороҕор сүүрбэ да күн иһигэр сыһыарыахтарын сөп.
Пандемия кэмигэр бэйэни хааччахтаныыны быһыы эрэ солбуйуон сөп диэн исписэлиистэр сабаҕалыыллар. Дойду сүрүн терапевт-бырааһа Оксана Драпкина этэринэн, Арассыыйаҕа коронавирус утары хас да вакцина оҥоһуллубут. Ол эрээри, маассабайдык «Спутник V» диэн вакцина туттуллан эрэр. Бу быһыы коронавирус килиэккэтиттэн оҥоһуллубатах, онон киһи доруобуйатыгар куттала суох диэн быһаарда. Вакцина организмҥа киирэн S-белок диэни таһаарар, бу белок вирус тутулугар баар, онон коронавируска иммунитеты үөскэтэр.
edersaas.ru