Анаабырга сүппүт дьон көстүбүттэрин туһунан истэн баран, Саха сирин олохтоохторо бары үөрдүбүт. Социальнай ситимнэргэ: «Дьол баар эбит! Бүгүн холкутук утуйууһубут…» — диэн ис хоһоонноох сурук элбээтэ.
edersaas.ru
Кырдьык, үөрүүлээх суол, доҕоттор! Мин Үрүҥ Хайа баһылыгын э.т. Анна Николаеваны булан, анаан кэпсэттим.
— Дьоммут көстүбүттэрин туһунан истибиппит чаас эрэ буолла. Үрүҥ Хайаттан сири-уоту үчүгэйдик билэр түөрт уопуттаах булчут састааптаах биригээдэлэри таҥмыппыт. Икки биригээдэ өрүс нөҥүө барбыттара. Игирэ кыргыттар аҕалара Олег Туприн: «Өрүһүнэн быһалыы барыам», — диэбит этэ. Саамай куттанарбыт диэн ол этэ. Наһаа сылаас күн-дьыл турар. Онон хаарбыт да суоҕун кэриэтэ. Дьоммут бураан суолун булбатахтар этэ. Хата, икки биригээдэ уруккуттан сылдьар суолбутунан көрдөөн, суолларын булан, «Среднэй» диэн сиртэн булан ылбыттар. Онно булчуттар үүтээннэрэ баар. Бурааннара алдьанан олороллор үһү. Онно мас олох суох сирэ. Инньэ гынан уоттара да суох быһыылаах. Дьоммут кэллэхтэринэ, чуолкайын билиэхпит. Бүгүн дьиэбитигэр тиийиэхпит дии санаабыт дьон өйүөлэрэ да суох буолуохтаах. Хайдах тулуйбуттарын сатаан санаабаппын. Олег оҕо эрдэҕиттэн ыстаадаҕа сылдьыбыт буолан, уопуттаах табаһыт. Онон сиргэ сылдьар үөрүйэҕэ быыһаатаҕа. Кэрэчээнэ да ытаабакка-аймаммакка аҕатыгар өйөбүл буолбута буолуо диэн сэрэйэбин. Кэскилээнэ ийэтинээн Сааскылаахха саҥа көтөн кэллилэр. Үөрүүлээх сонуну иһиттилэр, — диэн кэпсиир баһылык э.т. Анна Николаева.
Анна Анатольевна быһаарарынан, Олег Туприннаах айаннаабыт суоллара кыһын дьон быһалыы өрүү айанныыр суоллара эбит. Ол эрээри салайааччы бэлиэтииринэн, быйыл күһүнэ сылаас буолан, бакаа айанныы иликтэр эбит.
— Олег Туприн быйылгы суолу аһан, бастакынан айаннаары, бураана алдьанан, сүтэ сырыттылар. Хата, этэҥҥэ көһүннүлэр. Билигин уолаттар дьоммутун илдьэ иһэллэр, — диэн кэпсэтиибитин түмүктүүр Анна Николаева.
… Быйыл хоту дойдуга дьон сүтүүтэ бу иккис түбэлтэ. Соторутааҕыта Муомаҕа бөртөлүөт пилота сүтэн баран көстүбүтэ. Аны Анаабырга сүппүт дьон Саха сирин барытын эмиэ аймаатылар. Киһи кыраттан сылдьарын, олоҕо кылгаһын бу икки түбэлтэ туоһулуур. Хата, дьолго, дьон этэҥҥэ тыыннаах көһүннүлэр.
Олохпутугар көстөр уустук боппуруостар бу курдук киһини үөрдэр гына быһаарыллан иһэллэрэ буоллар даа…
Елена ПОТОЦКАЯ, «Саха сирэ» хаһыат, edersaas.ru
Хаартыска — интернеттэн.