Анаабыр улууһугар киин балыыһаҕа мэдиссиинэ бастакы сүһүөҕүн саҥардыы бырагырааматынан хапытаалынай өрөмүөн оҥоһуллар. Манна “Доруобуйа харыстабыла” национальнай бырайыак бырагырааматынан 15 мөлүйүөн солкуобай көрүллүбүт.
Балыыһа дьиэтин түннүктэрин, ааннарын, истиэнэтин саҥардаллар, ититии, уу систиэмэлэрин, сантехниканы уларыталлар. «Комуслуги» тэрилтэ өрөмүөн үлэтин ыыта сылдьар. Бу сыл бүтүөр диэри үлэни түмүктүүр былааннаахтар.
— Балыыһабыт хапытаалынай өрөмүөҥҥэ наадыйбыта ыраатта. Сотору кэминэн пациеннарбытын саҥардыллыбыт, сылаас, сырдык балыыһабытыгар көрсөрбүтүттэн олус үөрэбит, — диэн киин балыыһа кылаабынай бырааһа Варвара Горохова үөрүүтүн үллэстэр.
Өрөспүүбүлүкэ үрдүнэн мэдиссиинэ бастакы сүһүөҕүн саҥардыы үлэтэ тэтимнээхтик ыытылла турар. Бу бырагырааманан 2022 сылга номнуо 22 улууска (Алдаҥҥа, Аллайыахаҕа, Аммаҕа, Анаабырга, Булуҥҥа, Үөһээ Халымаҕа, Дьааҥыга, Кэбээйигэ, Ленскэйгэ, Мэҥэ Хаҥаласка, Мииринэйгэ, Нерюнгригэ, Ньурбаҕа, Өймөкөөҥҥө, Өлүөхүмэҕэ, Өлөөҥҥө, Орто Халымаҕа, Тааттаҕа, Томпоҕо, Усуйаанаҕа, Хаҥаласка, Эбээн Бытантайга) 26 балыыһа дьиэтэ өрөмүөннэннэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.