«Ростелеком» Анаабырга оптика утаҕын тардар.
Сыл саҕаланыаҕыттан «Ростелеком» 70 килэмиэтир ситими хоту хайысхаҕа — ыраах сытар Сааскылаах сэлиэнньэтин (Анаабыр) туһаайыытынан тардар. Үлэ Өлөөн оройуонуттан Дьэлиҥдэттэн Анаабыр оройуонун сиригэр-уотугар тиийбит. «Ростелеком» бу телеком-инфраструктураны киллэрии үлэтин сыл бүтүөр диэри түмүктүүр былааннаах. Ситим киирбитин кэнниттэн социальнай суолталаах тоҕус эбийиэк түргэн интэриниэккэ холбонуохтаах, оттон Сааскылаах олохтоохторо лимиитэ суох интэриниэккэ уонна атын сыыппаранан сервистэргэ холбонор кыахтаныахтара диэн иһитиннэрэллэр.
—ВОЛС ситимин тутуу кыраапык быһыытынан ыытыллан иһэр. Бүгүҥҥү күн туругунан, Сааскылаах диэки үлэ 40% ситиһилиннэ. Сибээс үлэһиттэрэ Анаабырга нэһилиэнньэлээх пууннар икки ардыларынааҕы учаастакка үлэлии сылдьаллар. Сыал-сорук толоруллара чугаһаата. Онон сааскылаахтар сотору кэминэн түргэн интэриниэтинэн туһанар кыахтаныахтара, — диэн этэр «Ростелеком» ПАУо «Сахателеком» филиалын дириэктэрэ Константин Войтеховскай.
—Оптоволокно ситимин киллэрии Анаабыр оройуонугар умнуллубат ураты түгэнинэн уонна сайдыы кэрэһитинэн буолуоҕа. Бу аан дойдуну кытары сибээс, дьоҕус уонна орто предпринимательствоны өйүүргэ, Дьокуускайы уонна Арассыыйа атын куораттарын кытта телемэдиссиинэнэн сүбэни-аманы тэрийэргэ кыах үөскүө. Үөрэх хаачыстыбата үрдүө, үүнэр көлүөнэ сайдарыгар тирэх баар буолуо. Маны сэргэ, олохтоохтор лимиитэ суох интэриниэтинэн туһанар уонна «Госуслуги» порталга ыраахтан олорон сайаапка суруйар кыахтаныахтара, — диэн Анаабыр оройуонун баһылыга Эдуард Платонов иһитиннэрэр.
Бэлиэтээн эттэххэ, Сааскылаах сэлиэнньэтин диэки ВОЛС ситимин тардыы «Ростелеком» хампаанньатын, СӨ Инновацияҕа, сыыппара сайдыытыгар уонна инфокоммуникация технологиятын министиэристибэтин уонна Анаабыр оройуонун кытары бииргэ үлэлээһининэн ситиһиллэр.