Анаабыр улууһа бырамыысыланнай оройуоннар ахсааннарыгар да киирдэр, улахан болҕомто табаны иитиигэ ууруллар. Быйыл 8 ыстаадаҕа 15400 табаны тутан олороллор. Бу күннэргэ Дьокуускай куоракка Россия табаһыттарын сийиэстэрэ ыытыллан, түгэнинэн туһанан Анаабыр улууһун баһылыгын солбуйааччы Наталья Спиридонованы кытары кэпсэттибит.
Анивера АКИМОВА, «Саха сирэ» хаһыат, edersaas.ru
Сийиэскэ анаабырдар 11 табаһыты уонна 18 табаны аҕалан кытыннардылар. Ол курдук, табаларын Үрүҥ Хайаттан Сааскылаахха диэри массыынанан, салгыы сөмөлүөтүнэн Дьокуускайга аҕалбыттар. Быйыл улууска 15400 табаны кыстатан туралларын туһунан Наталья Спиридонова «Акцент» биэриигэ кэпсээтэ.
Урукку сыллары кытары тэҥнээтэххэ, таба ахсаана элбээн иһэр. Холобур, 2013 сыллаахха 13 тыһыынчаттан тахса төбөлөөх этилэр. Билигин аҕыс ыстаада сылы эргиччи сиртэн-сиргэ көһө сылдьан, табаларын көрөллөр.
Анаабырдар сийиэс чэрчитинэн, «Анаабыр алмаастара» АУо-ны кытары бииргэ үлэлээһиҥҥэ сөбүлэһии түһэристилэр. Онон бырамыысыланнаһы уонна табаны иитиини дьүөрэлии тутан, анаабырдар бэрт сэргэхтик олороллор.
Ыспыраапка:
Анаабыр национальнай (долган-эбэҥки) улууһугар 3431 киһи олорор. 2002 сыллааҕы биэрэпискэ киирбитинэн, улууска 1097 саха (27,26%), 988 долган, (24,55%), 751 нуучча (18,66%), 564 эбэҥки (14,02%), 266 эбээн (6,61%) уонна да атын омуктар олорбуттар. Билигин нэһилиэнньэ ахсаана лаппа уларыйан турар.
Анивера АКИМОВА, «Саха сирэ» хаһыат, edersaas.ru