Өрөспүүбүлүкэ бырабыыталыстыбатын бэрэссэдээтэлинэн Галина Данчикова үлэлии олордоҕуна, Анаабыр национальнай (долган-эбэҥки) улууһа 2019 сылга таба ахсаанын 17 тыһыынчаҕа тириэрдэри хааччыйарыгар сорук туруоруллубута.
edersaas.ru
Анаабыр улууһун социальнай-экономическай сайдыытыгар туһуламмыт үлэ 2015 сыллааҕы түмүгүн итиэннэ кэлэр 2019 сылга диэри сайдыахтаах сүрүн тосхолун дьүүллэһэр мунньахха ылыллыбыт уураахха итинник суруллубута. Ол эрээри, бэлиэр, Анаабыр табаһыттара ити кирбиини 2017 сыллааҕы үлэ түмүгүнэн ыллылар.
Улуустааҕы тыа хаһаайыстыбатын управлениетын салайааччыта Ариан Неустроев этэринэн, улуус дьаһалтата (баһылык Иван Семенов) тыа хаһаайыстыбатын күүскэ өйүүрүн түмүгэр маннык өрө тахсыы кылгас кэм иһигэр ситиһилиннэ. Анаабыр табаһыттара ортотунан 36328 солкуобай, бастыҥнар 43993 солкуобай хамнаһы илиилэригэр ылаллар. Ол даҕаны иһин, атын улуустарга курдук, манна «табаһыт тиийбэт», «эдэрдэр ыстаадаҕа үлэлии тахсыахтарын баҕарбаттар» диэн саҥаны истибэккин.
Улууска табаны иитии салаатыгар Социалистическай Үлэ Дьоруойа Илья Спиридонов аатынан МУП 8 ыстаадата, Н.Е.Андросов аатынан ММУП соҕотох ыстаадата уонна «Улахан Бегичев» аҕа ууһун общината үлэлииллэр.
Василий НИКИФОРОВ, edersaas.ru