Маны аах Уопсастыба

Анаабыр дьуухалата интэриниэтинэн атыыланар

Николай Андросов аатынан муниципальнай оҥорон таһаарар тэрилтэ («Н.Е. Андросов аатынан ММУП») бу сылтан саҕалаан бэйэтин бородууксуйатын интэриниэтинэн атыылыыр эбит. Саха сирин биир аатырбыт видеоблогера Вячеслав Бродников «Клевая рыбалка» диэн ааттаах саайтыгар «Дары Анабара» диэн аатынан араас балыктан оҥоһуллубут дьуухаланы атыылыыллар.

Киэҥ Арассыыйа араас муннуктарыттан Сааскылаахха оҥоһуллубут ас атын да көрүҥнэрин атыылаһыахтарын баҕараллара эбитэ буолуо да, чахчы буортуйбакка тиийэр аһынан дьуухала эрэ буолар буоллаҕа. Оттон Саха сиригэр Анаабыр улууһугар оҥоһуллубут балыктан, таба этиттэн астаммыт амтаннаах бородууксуйаны син булуохха сөп. Холобур, ааспыт сылга Дьокуускай куоракка «Дары Анабара» фирменнэй маҕаһыын Поярков уулуссатыгар аһыллыбыта.

«БЫДАН ЭЛБЭҔИ ОҤОРОР КЫАХТААХПЫТ!»

Ол эрэн, «Н.Е. Андросов аатынан ММУП» тэрилтэ оҥорон таһаарар аһын үксэ улуус иһигэр атыыланан бүтэр. Сүрүн атыылаһааччыларынан олохтоох нэһилиэнньэ, «Анаабыр алмаастара» тэрилтэ буолаллар, быйыл «АЛРОСА-торг” хампаанньаны кытта хантараак түһэрсэргэ кэпсэтии бара сылдьар. Тэрилтэ дириэктэрэ Александр Михайлов оҥорон таһаарыыны кырата хас даҕаны төгүл холкутук үрдэтэр кыахтаахтарыгар бигэ эрэнэр:

— Үлэбит балык уонна таба этэ баарыттан тутулуктаах. Холобур, билигин, алтынньы саҥатыгар тэрилтэбит кыаҕын аҥаарынан үлэлии турабыт. Билигин күҥҥэ быһа хо­лоон 120 киилэ балыктан бэлэм ас уонна полуфабрикат оҥоро олоробут. Бу адьас кыра кээмэй – толору күүспүтүнэн үлэлиирбитигэр матырыйаал тиийбэт. Холобур, эти астыахпытын, табабыт этэ бүтэн турар. Бу күннэргэ халлаан дьэ тымныйда (кэпсэтии алтынньы 4 күнүгэр буолбута), сотору табаны өлөрүү саҕаланыаҕа, оччоҕуна үлэ тэтимэ күүһүрүөҕэ. Ол гынан баран, син биир эт тиийбэт – быйыл кыыл таба ааһар сирэ уларыйан Өлөөн улууһун диэки сыҕарыйан биэрбит, онон туттарыллар эт син биир кэмчи буоларын сабаҕалыыбын.

Өөрөспүүбүлүкэ салалтатын таһымыгар ту­руорсар өссө биир кыһалҕабыт – балыктыыр кубуотабыт тиийбэт. Алта балыктыыр учаастактаахпыт. Билигин 2 туонна чыыр, 4 туонна чорбоҕор (муксун) тутарга лиссиэнсийэлээхпит. Дьиҥэр, өссө 10 туонна чыыр, 10 туонна кэриэтэ муксуун тутарга эбии кубуота баара буоллар, сыахпыт сылы быһа толору күүһүнэн үлэлиэ этэ.

САҤА ХАЙЫСХАЛАР, ИННИКИ БЫЛААННАР

Сыах бу күҥҥэ диэри сүрүннээн чыыр, чорбоҕор, уомул балыктары астаабыт. Соторутааҕыта күндүөбэй (ряпушка) балыкка 17 туонналаах кубуота көрүллэн саҥа көрүҥү баһылааһыҥҥа
үлэ бара турар. Дьиҥэр, батарыы өттүгэр кыһалҕата суох үлэлии олороллор эрээри, күндүөбэйи олохтоох нэһилиэнньэ соччо ылбата биллибит. Ол эрэн, Александр Алексеевич итини улахан кыһалҕа буолуо дии санаабат:

— Күндүөбэйи тууһаан, ыһааран, хас да көрүҥ бородууксуйа оҥоруохпут. Бырамыысыланнас тэрилтэлэрэ өлгөмнүк атыылаһыахтарын сөп, интэриэс баар. Мииринэй оройуонун диэки дьон атыылаһыа, “АЛРОСА-торг” хампаанньаны кытта дуогабар түһэрсэргэ кэпсэтии бара турар. Уопсайынан, батарыы кыһалҕата саамай кыра буолар. Сайдыыбыт олуга – табаарбытын элбэтии, бородууксуйа саҥа көрүҥнэрин баһылааһын.

Күннээҕи харчы киирэригэр анаан Сааскылаах маҕаһыыннарыгар бэлимиэн, эриллибит эт, кэтилиэт, тиэптэл оҥорон атыылыыллар. Соторутааҕыта фирменнэй хоруопкалары сакаастаан пицца оҥорон атыылыыр буолбуттар. Бу аһы маҕаһыыҥҥа тиийээтин кытта олоччу атыылаһан кэбиһэллэр эбит. Социальнай ситимнэргэ, Сааскылаах уопсай чатыгар “пицца атыыга таҕыста” диэн сонун таҕыста эрэ сонно тута атыылаһааччы маҕаһыыҥҥа тиэтэйэр эбит. “Этэ, халбаһыыта өлгөм, хата оҕуруот аһын өттө тутах соҕус – олохтоох уратыбыт”, — диэн күлсэллэр сыах үлэһиттэрэ.

Тэрилтэ технолога Елена Попова Сааскылаахха төрөөбүт, улааппыт киһи. Бу тэрилтэҕэ үлэҕэ киирбитэ нэдиэлэ эрэ буолбут:

— Дойдубар бу сайын Дьокуускайтан АГАТУ-ну бүтэрэн кэлбитим. Оҥорон таһаарар тэрилтэҕэ быраактыка кэмигэр “Скиф” хампаанньаҕа үлэлээбитим. Манна бэйэм дьонум ортотугар, дойдубар бултанар аһы-үөлү астыыр арыый судургу буолсу диэн сыаналаатым. Тэрилтэбит үлэлиир тэрилэ саҥа, аныгы ирдэбиллэргэ эппиэттэһэр. Онон бородууксуйаны элбэтэргэ, хаачыстыбатын биир үрдүк таһымҥа тутарга кыһаллар былааннаахпын.

ТҮМҮККЭ

Таба ыыһаммыт ойоҕоһо, муксуун дьуухалата, тууһаммыт уомул, күн аайы сииргэ анамматах күндү, омуктуу эттэххэ, “деликатес” астар. Сааскылаахха оҥоһуллубут бу астар Дьокуускай киинигэр Поярков уулуссаҕа оптуобус сылаас тохтобулугар Анаабыртан быһа кэлэн атыыланаллар. Александр Михайлов этэринэн, бу бородууксуйаны тиэйии “Анаабыр алмаастарын” кытта туспа сөбүлэҥ чэрчитинэн оҥоһуллар буолан, ортотунан куорат ырыынагыттан чэпчэки сыанаҕа атыылыыллар үһү. Бырааһынньык остуолун киэргэтэргэ биирдэ эмэтэ атыылаһа тиийэ сылдьыллыа этэ. “Дары Анабара” оҥорооччуларыгар торумнаабыт былааннара туолан, кубуоталара үрдээн, күүстээх үлэни көрсөллөрүгэр баҕарыаҕыҥ!

Егор Карпов.

Ааптар хаартыскалара

1
0