Саха сиригэр «Олохтоох каадырдары — бырамыысыланнаска» бырайыак чэрчитинэн үлэтэ уонна дьарыга суох дьону идэҕэ үөрэтии саҕаланна.
«Анаабыр алмаастара» хампаанньа сакааһынан ыытыллар үөрэх икки түһүмэҕинэн барыаҕа. Бастакы түһүмэххэ онлайн көрүҥүнэн билиини ылаллар, иккискэ тэрилтэ базатыгар быраактыкаланаллар.
Хампаанньа ирдэбилинэн каадырдары талыы кэнниттэн Анаабыр уонна Өлөөн улуустарыттан 40 киһи олунньу 1 күнүттэн үөрэҕин саҕалаата. Кинилэр Белаз суоппарын, ДСМиТ слесара, бульдозер машиниһа, грохотовщик, сепараторщик идэтигэр үөрэнэллэр.
Үөрэнэн бүппүттэрин кэннэ 24 киһи Анаабыр улууһугар хампаанньа учаастактарыгар, 16 киһи Өлөөн улууһугар үлэҕэ ылыллыахтара.
«Бу — «Ооохтоох каадырдары — бырамыысыланнаска» дьоһун суолталаах бырайыак чэрчитинэн идэҕэ үөрэтии бастакы түһүмэҕэ. Иккис түһүмэх олунньу ортотуттан саҕаланыа. Билиҥҥитэ АЛРОСА, «Якутуголь», «Колмар», «Полиметалл» уо.д.а хампаанньалартан сайаапкалар киирдилэр. Быйыл 1,5 тыһыынча курдук киһи, ол иһигэр ыччат, үөрэниэҕэ. Дьарыктаах буолуу сулууспатын уорганнарын, муниципальнай тэриллиилэр баһылыктарын, үлэни биэрээччилэр холбоһуктаах үлэлэринэн эрэ тустаах түмүктэри ылыахпыт», -– диэн дьарыктаах буолуу судаарыстыбаннай кэмитиэтин бэрэссэдээтэлэ Елена Калашникова бэлиэтээн эттэ.
Надежда ЕГОРОВА, «Саха сирэ», edersaas.ru