Төрөөбүт дойдубутугар нэһилиэнньэ дьарыктаах, сөбүлүүр үлэлээх, хамнастаах буоларын туһугар үлэлэһэр координационнай кэмитиэт сүбэ мунньаҕын иһинэн Нэһилиэнньэ дьарыктаах буолуутугар судаарыстыбаннай кэмитиэт «Анаабыр алмаастара» АУо кытта сөбүлэһии түһэристэ. «Олохтоох каадырдары – бырамыысыланнаска» сүрүн суолталаах бырайыагы 2018-2022 сс. олоххо киллэрэргэ ити докумуон улахан стратегическай суолталаах, юридическай күүстээх.
edersaas.ru
Координационнай кэмитиэт бэрэссэдээтэлэ, СӨ Бырабыыталыстыбатын бэрэссэдээтэлин солбуйааччы Алексей Дьячковскай этэринэн, бу бэлиэ ситиһии олохтоох дьону, чуолаан хотугу арктическай оройуоннары үлэнэн хааччыйарга төһүү күүс буолуоҕа.
Олохтоох дьону бырамыысыланнаска сыһыарарга «Анаабыр алмаастарын» кытта 15 сөбүлэһии оҥоһулунна. Биэс сыл тухары, аны 2020 сылга диэри 350 тыа сирин олохтооҕо алмаастаах хампаанньаҕа үлэҕэ киириэхтээх.
2022 с. диэри улахан тэрилтэлэргэ үлэһиттэри аттаран туруоруу, саҥа инвестиционнай бырайыактарга үлэ миэстэлэрин тэрийии туһунан кэпсэтии барда.
Нэһилиэнньэ дьарыктаах буолуутугар судаарыстыбаннай кэмитиэт бырамыысыланнас тэрилтэлэригэр сыл ахсын туох ханнык идэлээх, үрдүк уонна орто анал үөрэхтээх үлэһиттэргэ наадыйыы баарын испииһэктээн биэрэллэригэр туһаайан эттэ.
«Анаабыр алмаастарыгар» үлэлии барыан баҕалаах киһи Дьарыктаах буолуу киинин нөҥүө кэпсэтэн, оробуочай идэҕэ үөрэнэн, хамнастаах үлэҕэ барыан сөп.
Марианна ТЫРТЫКОВА, «Саха сирэ», edersaas.ru