Сүрүн Успуорт

Анаабыр кыргыттара маастар нуорматын толорор былааннаахтар

Анаабыр улууһуттан «Манчаары оонньууларыгар» 30 спортсмен илин-кэлин түсүһэ кэллэ. Олор истэригэр Үрүҥ Хайа нэһилиэгиттэн сылдьар Анна Туприна уонна Оксана Кылтасова бааллар. 

Төрөөбүт улуустарын аатын көмүскүү кэлбит спортсмен кыргыттар маннык кэпсээннээх буоллулар:

— Мин буулдьанан ытыынан дьарыктаммытым иккис сыла буолла. Билигин Дьокуускай куорат 31-с №-дээх оскуолатыгар 9-с кылааска үктэнним. 5-с №-дээх оҕо спортивнай оскуолатыгар Иван Гурьевка дьарыктанабын. «Манчаары оонньууларыгар» күрэхтэһэрбиттэн улаханнык долгуйбаппын. Бу иннинэ Арассыыйатааҕы күрэхтэһиигэ кыттан кэллим, үһүс буолбутум. Өрөспүүбүлүкэҕэ уонна куоракка бастыыр иһин күрэхтэһиилэргэ эмиэ ситиһиилээхтик кыттыбытым. «Манчаарыга» кыттарбын истээт даҕаны, успуорт маастарын нуорматын толорорго үлэлэһэр эбиппин диэн санааламмытым, — диэн Анна Туприна кэпсиир.

Оттон кини дьүөгэтэ Оксана Кылтасова Үрүҥ Хайа оскуолатын тохсус кылааһын бүтэрбит эбит. Кини национальнай многоборьенан дьарыктаммыта балай даҕаны ырааппыт. Оксана этэринэн, бииргэ күрэхтэһэр кыргыттарын билэр, үс миэстэ иһигэр киирэргэ, маастар нуорматын толорорго былааннанар.

Санатан суруйдахха, бу нэдиэлэҕэ Горнай улууһун Бэрдьигэстээҕэр XXI төгүлүн буолар «Манчаары оонньуулара» саҕаланна. Успуорт 11 национальнай көрүҥэр 40 хамаанда күрэхтэһэрэ күүтүллэр.

Айтана Аммосова, edersaas.ru

Хаартыскаҕа хаҥастан уҥа: Оксана Кылтасова уонна Анна Туприна.

Ааптар түһэриитэ.

0
0