Соторутааҕыта “Якутия” ФАПК бэйэтэ оҥорон таһаарар утахтарын социальнай ситимнэргэ суруйар блогердары мунньан, анаан амсатта.
Биллэн турар, ханнык баҕарар тэрилтэ бэйэтэ оҥорон таһаарар бородууксуйатын батарар интэриэстээх. “Якутия” ФАПК сотору-сотору оҥорон таһаарар утахтарын амсатан, дьон санаатын истэр. Тэрилтэ салайааччытын бастакы солбуйааччы Туйаара Алексеева араас утаҕы кутан, хаста да төхтүрүйэн нүөмэрдээх чааскылартан хаачыстыбаларынан ханнык утахтар чорбойоллорун бэлиэтэттэ.
Амсайааччылар, бары кэриэтэ утаҕы иһэр дьон быһыылаах, холкутук бэриллибит анкетаны толорон туттардылар. Амсайыы түмүгэр бары утахтартан икки бастакы миэстэҕэ тахсан, “Якутия” ФАПК утахтара бастаан таҕыстылар.
Мин блогердар ортолоругар алгысчыт Александр Саввинов-Алгыстаах Өлөксөөн баарын көрсөн, санаатын этэригэр көрдөстүм.
— Сахалар омук быһыытынан туһунан астаах-үөллээх, уулаах-хаардаах дьоммут. Мин кэрэхсиирим диэн, “Якутия” ФАПК омук, нация чөл буолуутун туһугар бэйэтин бородууксуйатын оҥорон таһаарар өрөспүүбүлүкэҕэ биир бөдөҥ тэрилтэнэн буолар. Бу тэрилтэ оҥорон таһаарбыт бородууксуйата биһиги Өлүөнэ Эбэбит уутуттан оҥоһуллан тахсар. Өбүгэ саҕаттан бэйэбит дойдубут эйгэтигэр сөп түбэһэр омук буолан, уубут-хаарбыт бэйэбит эппитигэр-хааммытыгар иҥэмтиэ. Бэйэ дойдутугар оҥоһуллан тахсыбыт аһы аһааһын доруобуйаҕа эрэ туһалаах буолбакка, дойдубут экэниэмикэтэ бөҕөргүүрүгэр кытта өйөбүллээх. Олохтоох бородууксуйаны оҥорон таһаарааччыга харчытын 100 %-на өрөспүүбүлүкэҕэ хаалар. Ол ону өйдүөх тустаахпыт. Төһөнөн атын дойду уонна омук бородууксуйатын атыылаһабыт да, харчыбыт тас дойдуга тахса турар.
Олохтоох бородууксуйаны оҥорон таһаарар тэрилтэ аһа-үөлэ батарылларыгар улахан интэриэстээх буолуохтаах. Бу маннык амсайыы тэрээһиннэрин ыытыы, хаачыстыбаҕа үлэлэһии биир көрүҥэ. Мин араас утаҕы амтанынан кыайан таайбатым. “Фантаны”, “Пепсини, “Коланы” олох испэппин. Бу утахтары амсайан баран, чопчу бу фирма киэнэ эбит диир да кыаҕым суох. Амтанынан балл туруорар буолан, бу олус сөптөөх сыанабыл. ФАПК утахтара миэхэ бастакы-иккис миэстэҕэ таҕыстылар. Мин төһө да сыыспытым иһин, утах амтанын билбэт киһи көрүүтүгэр, ФАПК оҥорон таһаарбыт бородууксуйата бүтэһик буолуохтааҕар, үһүс да миэстэҕэ түспэтэ ээ. Бастакы уонна иккис пууннаах көрдөрүүгэ турар. Бу тугу этэрий? Ол аата, биһиги олохтоох оҥорон таһаарар тэрилтэбит оҥорон таһаарыытын хаачыстыбатынан хайа баҕарар ааттаах-суоллаах фирманы кытта күрэстэһэр таһымнаах эбит.
Билбэт эрдэхпинэ “наар арыгы оҥорон, дьону итирдэллэр” диэн бу тэрилтэни соччо сөбүлээбэт этим. Онтон кэлин арыгы аатын уларытыы боппуруостарыгар үлэлэһэн баран, кинилэри олох атын харахпынан көрбүтүм, — диэн санаатын үллэһиннэ сэһэргэһээччим.
«Якутия» ФАПК арыгы оҥорон таһаарар бородууксуйатын 80%-на — кыраадыһа суох утах. Саха сиригэр ас-үөл бырамыысыланнаһын бастыҥ тэрилтэлэриттэн биирдэстэрэ. Бүгүҥҥү күҥҥэ тэрилтэ үс собуотугар бородууксуйа 37 көрүҥэ оҥоһуллан тахсар. “Саха сиригэр оҥоһулунна” бренди инники кэккэҕэ тутан иһэр биир бастыҥ тэрилтэ.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.