Саха сирин норуоттарын спортивнай оонньууларын бүтэһик күнүгэр «Амма-Олимп» стадиоҥҥа Үс иилээх хапсаҕайга 70 уонна 70-тан үөһэ кг ыйааһыннарга муҥутуур кыайыылаахтары быһаарар түһүлгэ тэрилиннэ.
Ол курдук, 70-ҥа диэри кг барыта 17 бөҕөс күөн көрүстэ. Онуоха бүтэһик быһаарыылаах хапсыһыыга Тааттаттан Егор Захаров биллиилээх хапсаҕайдьыт Дмитрий Ушницкайы охторон, кыайыылааҕынан буолла. Киниэхэ бириис быһыытынан тэрийээччилэр убаһа туоһу суругун туттардылар.
Оттон 70-тан үөһэ кг 9 бөҕөс суруттарда. Маныаха ааспыт нэдиэлэҕэ Туймаада ыһыаҕын муҥутуур кыайыылааҕынан буолбут Айаал Лазарев утуу-субуу Дмитрий Нехоруковы, Увар Тимофеевы уонна быһаарыылаах хапсыһыыга Кузьма Сивцеви түҥнэритэ көтүөлээн, бастаата. Киниэхэ эмиэ убаһа туоһу суруга туттарылынна.
Амма олохтоохторо, спорду сэҥээрээччилэр Үс иилээх хапсаҕайы сөбүлээтилэр, астыннылар.
Петр Павлов.