СӨ Судаарыстыбаннай Мунньаҕын (Ил Түмэн) дьокутаата Руслан Федотов Экология судаарыстыбаннай кэтэбилин Амматааҕы иниспиэксийэтигэр соһуччу бэлэх оҥордо.
Саха АССР төрүттэммитэ 100 сылынан Саха Өрөспүүбүлүкэтин экологияҕа, айылҕаны туһаныыга уонна ойуур хаһаайыстыбатыгар министиэристибэтин Экология судаарыстыбаннай кэтэбилин Амматааҕы иниспиэксийэтэ бэртээхэй бэлэх тутта. Ол курдук, Ил Түмэн дьокутаата Руслан Федотов иниспиэксийэ үлэһиттэрэ ийэ айылҕаны араҥаччылыыр, харыстыыр, экологияҕа буруйу оҥорууну, араас хоромньу тахсыбатын туһугар туруулаһар үлэлэригэр туһанныннар диэн УАЗ микроавтобус массыынаны бэлэхтээтэ.
“Бу тиэхиньикэни саас халаан уутун кэмигэр, сайын тыа баһаардарыгар кэмитиэт үлэһиттэрэ күөх суугун айылҕабытын, кини кыылын-сүөлүн харыстыыр, онно ыытар үлэлэригэр туһанныннар, үлэлэрин суһаллык оҥороллоругар көмө буоллун диэн тапталлаах өрөспүүбүлүкэбит 100 сыллаах өрөгөйдөөх үбүлүөйүнэн бэлэхтээтим», – диэн этэр Руслан Еремеевич.
Санатан эттэххэ, Руслан Еремеевич аҕыйах сыллааҕыта Амма улууһун 4 оскуолатыгар эмиэ саҥа УАЗ микроавтобус массыыналары бэлэхтээн турардаах. Ону да таһынан араас кыһалҕалары, харгыстары туоратыыга хаһан да туора турбат, ол курдук, 2018 сыллаахха буолбут улахан халаан уутуттан эмсэҕэлээбиттэргэ эмиэ кэмигэр күүс-көмө буолбута. Амма улууһугар айылҕаҕа ордук сайыҥҥы кэмҥэ дьон дьалаҕайыттан эбэтэр этиҥтэн турбут өрт уотун умулларарга, хамнастаан туран дьону хомуйар, тиэхиньикэнэн, оттугунан хааччыйар.
“Амма” айылҕа ураты харыстанар сиригэр норуот дьокутаата, урбаанньыт Федотов Р.Е. ыытар үлэтэ атыттарга холобур буолар.
Бэлэмнээтэ Аграфена Матвеева
Хаартысканы: ааптар