Амма нэһилиэгэр Төрүт Сокуоҥҥа уларытыылары киллэрэр куоластааһыҥҥа былааннаах үлэ барар
От ыйын 1 күнүгэр буолуохтаах Төрүт Сокуоҥҥа уларытыылары киллэрэр куоластааһын туһунан Амма нэһилиэгин баһылыга Михаил Артемьев санаатын үллэстэр:
— «Амма нэһилиэгэ» муниципальнай тэриллии сиригэр-уотугар Төрүт Сокуоҥҥа уларытыылары киллэрэр куоластааһыҥҥа былааннаах үлэ барар.
Ол курдук, Амма нэһилиэгэр бэс ыйын 8 күнүгэр куоластааһыҥҥа анал хамыыһыйа тэриллэн үлэлиир.
Нэһилиэккэ уопсайа 3500 кэриҥэ быыбардааччы, 3 быыбардыыр уокурук баар: «Мировской», «Восточнай» уонна «Западнай». УИК-тар бэс ыйын 25 чыыһылатыттан саҕалаан аадырыстарынан сайаапканан сылдьалларыгар тырааныспарынан уонна бэнсиининэн хааччыллыахтара.
Оройуон киинигэр бэс ыйын 25 күнүттэн от ыйын 1 күнүгэр диэри уопсайа 24 уопсастыбаннай наблюдателлэр үлэлиэхтэрэ, маны таһынан волонтердар үлэлэрин улуус дьаһалтатын тэрийэр штаба иилээн-салайан үлэлэтэр, манна «БАТЫС» ыччат уопсастыбаннай тэрилтэтэ, ыччаттар сылдьыахтара.
Бэс ыйын 19 күнүгэр Амма нэһилиэгин 3 быыбардыыр уокуругар харыстанар мал: мааскалар, бэрчээккилэр, антисептиктар, термометр, биирдэ кэтиллэр халаат, уруучукалар, бакыаттар о.д.а кэмигэр кэлэн түҥэтилиннэ.
Улуус быыбардыыр хамыыһыйата нэһилиэк быыбардыыр уокуруктарыгар, нэһилиэк дьаһалталарын бэрэстэбиитэллэригэр бэс ыйыгар ВКС нөҥүө онлайн сэминээр тэрийэн ыыппыта. Манна тэрээһин үлэлэлэргэ, харыстаныыга, быыбардыыр уокуруктарга бэйэлэрэ кыайан тиийэн куоластыыр кыахтара суох дьоҥҥо куоластааһыны ыытыы уратыларын быһаарбыттара.
Маны таһынан, нэһилиэк түөлбэлэринэн, тэрилтэлэринэн анал кыраапык оҥоһуллан, күнүнэн, чааһынан тиийэн куоластыахтара.
Ньургуйаана Иванова, edersaas.ru