Ааспыт ыйга «Саха сирин киэн туттуута» норуот бириэмийэтин «Үлэ киһитэ» номинациятыгар, финалга тахсыбыт биэс киһиттэн бүтэһик куоластааһын түмүгүнэн инники күөҥҥэ Амматааҕы РЭС электромонтера Михаил Лазарев тахсыбыта.
Уопсайа 13643 куолас киирбититтэн, Амма бэрэстэбиитэлигэр 5479 киһи куоластаабыта. Михаил Кузьмич «Якутскэнерго» тэрилтэҕэ 1972 сылтан үлэлиир. 1987 сылтан — Амматааҕы РЭС электромонтера. Тэрилтэ бэтэрээннэрин сэбиэтин чилиэнэ, бэрэстэбиитэллээх уорган дьокутаата.
— Амма улууһуттан Михаил Лазарев «Саха сирин киэн туттуута» анал бириэмийэ үһүс бочуоттаах кыайыылааҕынан буолла. Манан аммалар бүтэһик «туочуканы» туруорбаппыт чахчы. «Сахамедиа» айар үлэһиттэрэ киһи дууһатыгар олус истиҥник киирэр «Саха сирин киэн туттуута» диэн бириэмийэ анал бырайыагын олохтообуттарыгар барҕа махталбытын тиэрдэбит. Бэйэбит улууспут дьонугар куоластаарыбыт «дойдубут дьонун туһугар» диэн санаанан салайтаран, биһигини сомоҕолоһуу сырдык тыына кууста. Биһиги олус түмсүүлээх уонна дойдубут дьонугар болҕомтолоох буоллубут, — диэн бириэмийэни туттарыы тэрээһинигэр Амма землячествотын дьоно-сэргэтэ санаатын тиэртэ. Биир дойдулааҕын Михаил Лазаревы эҕэрдэлээн, предприниматель Руслан Федотов эмиэ кэлэн тыл эттэ. Кини олунньуга «Бастыҥ урбаанньыт» номинацияҕа «Саха сирин киэн туттуута» анал бириэмийэнэн бэлиэтэммитэ. Оттон ахсынньыга «Бастыҥ быраас» номинацияҕа эмиэ Амматтан 2 №-дээх өрөспүүбүлүкэтээҕи балыыһа бырааһа Степан Тордуин кыайыылааҕынан тахсыбыта.
«Саха сирин киэн туттуута» диэн бириэмийэни туттарыыга Амма улууһуттан үһүс кыайыылааҕы эҕэрдэлиир тылыгар «Сахамедиа» генеральнай дириэктэрин бастакы солбуйааччы Афанасий Ноев:
— Михаил Кузьмич курдук тустаах үлэлэригэр олус эппиэтинэстээх дьон баар буолан, биһиги дьиэлэрбитин өрүү электричество уота сырдатар, — диэн эттэ.
— Электромонтер идэтэ баар буолан, норуот хаһаайыстыбатын бары салаата сайдар, — диэн ОДьКХ миниистирэ Данил Саввинов бэлиэтээтэ.
Тыл эппит дьон бары:
— «Сахамедиалар», аата да этэрин курдук, «Саха сирин киэн туттуута» диэн бириэмийэни олохтоон, Сахабыт сирин сайдыытыгар сүҥкэн кылааттарын киллэрэ сылдьар дьону айхаллаан, кинилэринэн киэн туттууну сахтыгыт, — диэн санааларын тиэртилэр.
«Үлэ киһитэ» — «Саха сирин киэн туттуута» бириэмийэ (анал бырайыак) алтыс номинацията. Бүгүҥҥү күҥҥэ аны «Бастыҥ спортсмен» номинацияҕа уһулуччу спортсмены талыыга «күөх уот» умайда.
«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр таба тайаммыт үлэттэн дьоллонор дьону кэмигэр бэлиэтээн көрүү буолар. Кинилэргэ махтал тылларын үлэлиир үгэннэригэр сырыттахтарына этэн үөрдүү.
Бэлиэтээн эттэххэ, «Саха сирин киэн туттуута» бырайыак Саха сирин судаарыстыбаннаһын күнүгэр биллэриллибитэ. Ол курдук, алтынньыга ыытыллыбыт «Бастыҥ учуутал» номинацияҕа Чурапчы оскуолатын учуутала Владислав Кривошапкин, сэтинньигэ — «Ыччат лиидэрэ» номинацияҕа ХИФУ профсойууһун кэмитиэтин салайааччыта Артём Иванов кыайбыттара. Ахсынньыга «Быраас» номинацияҕа кыайыылааҕынан 2 №-дээх өрөспүүбүлүкэтээҕи балыыһа бырааһа Степан Тордуин, «Култуура диэйэтэлэ» номинацияҕа Сунтаарга үҥкүү бөлөҕүн салайар Августина Клакинова бэлиэтэммиттэрэ. «Бастыҥ урбаанньыт» номинацияҕа Руслан Федотов кыайыылааҕынан тахсыбыта.
Бырайыак генеральнай партнера — саха иһитин-хомуоһун пропагандалыыр «Көмүлүөк» фирма.
Елена ПОТОЦКАЯ, «Саха сирэ» хаһыат, edersaas.ru
Хаартыскалар: СИА саайтыттан