Амма улууһун дьаһалтата Ил Дархан Айсен Николаев Амма баһыгар маһы кэрдиини тохтоппутун, өрөспүүбүлүкэ олохтоохторо Амма Эбэ көмүскэлигэр биир киһи курдук туруммуттарын иһин махтанан, Инстаграмҥа маннык ис хоһоонноох суругу таһаарда:
edersaas.ru
«Амма улууһа» муниципальнай тэриллии дьаһалтатын уонна дьокутааттар улуустааҕы Сэбиэттэрин ааттарыттан биһиги тапталлаах, төрөөбүт Аммабыт экологията туруктаах буоларын туһугар кыһамньыгыт иһин махтанабыт!
Саха Өрөспүүбүлүкэтин Ил Дархана Айсен Николаев муус устар 24 күнүгэр социальнай ситимнэринэн быһа сибээскэ тахсыытыгар Амма өрүс баһыгар маһы кэрдиини тохтоторун туһунан иһитиннэрдэ!!!
– Боппуруоһу үөрэтии барыта эриэ-дэхси буолбатаҕын көрдөрдө. Иркутскай хампаанньатын бырайыага элбэх боппуруоһу үөскэтэр. Кэккэ салаалара (разделлара) суохтар итиэннэ үгүс докумуоннара грамотнайа суох оҥоһуллубуттар. Онон, Амма баһыгар маһы кэрдии тохтотуллар, — диэн бэлиэтээтэ Айсен Сергеевич.
Ытыктабыллаах Айсен Сергеевичка кэмигэр ылбыт муударай быһаарыытын иһин, өрөспүүбүлүкэ Судаарыстыбаннай Мунньаҕын (Ил Түмэн) дьокутааттарыгар, көҕүлүүр бөлөхтөр, уопсастыбаннай тэрилтэлэр кыттыылаахтарыгар, өрөспүүбүлүкэбит бары олохтоохторугар Саха сирин экологиятын, айылҕатын харыстабылыгар биир киһи курдук сорунуулаахтык туруммуккут иһин махтанабыт. Биһиги күүспүт – түмсүүгэ!
Амма улууһун дьаһалтата, улуустааҕы Сэбиэт дьокутааттара, сүрүннүүр сүбэ
«Саха сирэ», edersaas.ru
Хаартыска интэриниэттэн.