Илин эҥээр улуустартан Амма улууһун тыа хаһаайыстыбатын управлениетын начаалынньыга Ион Кононовтыын от үлэтин балаһыанньата хайдаҕын-тугун ыйыталастыбыт.
«Быйыл 30400 туонна оту, 2900 туонна сиилэһи, 1500 туонна сенаһы бэлэмниэхтээхпит. 1005 звеноҕа 2420 киһи үлэлиир, 1066 тиэхиньикэ көмөлөһөр. Бу күннэргэ от былааныттан 66,1 бырыһыанын толордубут. Ол аата 20091 туоннаны оттоотубут. Былырыын баччаларга 20719 туонна оттоох этибит, ол аата 600 туоннанан хаалан иһэбит. Бытаарыы сүрүн төрүөтүнэн ардахтар буолаллар. Мобильнай биригээдэлэри тэрийдибит. Сотору уонча хаһаайыстыба ыраах сирдэргэ баран оттуоҕа. Билигин 25 хаһаайыстыба ыраах сирдэргэ хайыы үйэ тиийэн оттуу сылдьар. Мобильнай биригээдэлэрбит 4490 туоннаны оттуур былааннаахтар. Атырдьах ыйын 15 күнүнээҕи туругунан, 1689 туоннаны чөкөттүлэр. Быйылгы былааммытын толоробут диэн бөҕөх санаалаахпыт.
Күн бүгүн кэтэх хаһаайыстыбалаах дьон хайыы үйэ оттоон бүтэн эрэллэр. Тэрээһиннээх, бааһынай хаһаайыстыбалар уонна мобильнай биригээдэлэрбит күүскэ оттуу сылдьаллар. Балаҕан ыйын аһардан, этэргэ дылы, хаар түһүөр диэри оттуур санаалаахпыт. Улуус үрдүнэн сиилэстээһини саҕалаан, 1000 туоннаны бэлэмнээтибит, ол аата 30 бырыһыанын үмүрүттүбүт. Сенаһы бэлэмнээһини эмиэ саҕалаатыбыт, былааммытын толоруохпут диэн эрэнэбит. Чурапчыга, Дьааҥыга, Кэбээйигэ балаһыанньа уустугун билэн олоробут. Онон аны кыһын атыыга диэн оту бэлэмниир санаалаахпыт. Улууспут иһигэр Сатаҕай уустук балаһыанньалаах, аһара курааннаан отторо үүммэтэ. Былааннарыттан 40 бырыһыанын эрэ оттоон олороллор. Билигин Абаҕа, Соморсун нэһилиэктэрин сирдэринэн Чурапчыттан хас даҕаны мобильнай биригээдэ кэлэн оттуу сылдьар. Ону таһынан Мэҥэ Хаҥалас улууһуттан анал биригээдэ Эмис нэһилиэгин сиригэр кэлэн оттуохтаах. Ону таһынан Покровка, Бөтүҥ эргин оттуу кэлиэхтээхтэр Кэлэр нэдиэлэттэн хомуурга киирээри олоробут. Атырдьах 16 күнүгэр Абаҕа хаһаайыстыбата хайыы-үйэ хомууру саҕалаата. Бу күннэргэ “Амма” сопхуос киириэҕэ. Уоннааҕылар кэлэр нэдиэлэ бүтэһигин эргин хомуур үлэтин саҕалыахтара. Туох баар субсидия харчыта барыта кэмигэр кэлэ турар. Үүт былааныттан 60 бырыһыанын толордубут», — диэн Ион Семенович кэпсээтэ.
Видео-устуу: Абаҕа уонна Бөтүҥ хаһаайыстыбалара сиилэстээһини саҕалаабыттар. Видеолары уонна хаартыскалары Ион Кононов тиксэриитэ.