Улуу Кыайыы 75 сылын биһиги өрөспүүбүлүкэбитигэр хас улуус ахсын, коронавирус турбут кэмэ да буоллар, быйыл уратытык бэлиэтээтибит.
Аҕа дойдуну көмүскээччилэрбитигэр, бэтэрээннэрбитигэр төлөннөөх эҕэрдэ тиэрдилиннэ. Бүгүн Амма улууһун дьаһалтатын социальнай эйгэҕэ уонна ыччат бэлиитикэтигэр бырабылыанньа салайааччыта Саргылаана Неустроева Аммаҕа кыайыы күнэ хайдах ааспытын сырдатта:
— Бу бүттүүн дойду үрдҕнэн турбут сыстыганнаах ыарыы пандемиятын кэмигэр Амма улууһун дьоно-сэргэтэ, ыччата Улуу Кыайыы 75 сыллаах өрөгөйдөөх үбүлүөйүн үгүс улуустар курдук эмиэ дистанционнайынан, ыраахтан олорон бэлиэтээтибит. Ол курдук социальнай ситим нөҥүө ыам ыйын 4 күнүттэн саҕалаан араас аахсыйалары, онлайн күрэстэри, кэнсиэртэри ыыттыбыт. Улуус ыччата, волонтердар Кыайыы күнүн көрсө үгүс тэрээһиҥҥэ көхтөөхтүк кытынныбыт. Кыайыыны уһансыбыт сэрии, тыыл бэтэрээннэрин эҕэрдэлээтбит. Билигин улууспутугар үс аҕа дойду сэриитин кыттыылааҕа уонна 119 тыыл бэтэрээнэ баар. Кинилэри дьиэлэринэн кэрийэн эҕэрдэлээтибит.
«Георгиевскай лиэнтэ», «Кыайыы түннүктэрэ», «Эһиэхэ, күндү дьоммут», » Олбуорунан ыллыыбыт», «Кыайыы уоттара»,»Арассыыйа былаахтара», «Өйдөбүл чүмэчитэ» аахсыйалары ыыттыбыт. Төһө даҕаны элбэх дьону түмэн ньиргиэрдээхтик бэлиэтээбэтэрбит, ытык күн суолтата, кыайыыны уһансыбыт дьоммутугар сүгүрүйүүбүт тыына сыппаабата. Ол курдук, бэҕэһээ, кыайыы күнүгэр сарсыарда улууспут киинигэр Кыайыы знамятын таһаарыы, өйдөбүнньүк веногу ууруу уонна «Т-34-85» тааҥка макыатын үөрүүлээх аһыллыыта буолбута. Дьон-сэргэ астынна, онлайнынан уонна тиэргэннэринэн ыллаан бырааһынньык суолтатын сүтэрбэтибит. Кэлэр күһүн, дьаҥ аастаҕына өссө ньиргиэрдээхтик Улуу Кыайыы 75 сыллаах үбүлүөйүн бэлиэтиэхпит.
Ульяна Захарова.