Бэҕэһээ, сэтинньи 4 күнүгэр, Амма улууһун Бөтүҥ нэһилиэгэр ыал дьиэтэ баһаарга былдьаныытыгар дьахтардаах эр киһи өлүктэрэ булуллубута. Уопсайа 49 кв.м. иэн уокка былдьаммыт.
Уокка былдьаммыт дьахтардаах эр киһи өлүүлэрин дьыалаларынан өрүс уҥуордааҕы оройуоннар икки ардыларынааҕы силиэстийэлиир управление кэмитиэтэ Арассыыйа Федерациятын холуобунай кодексатын 105 ыстатыйатын «а» пуунун 2-с чааһынан «өлөрүү» диэн холуобунай дьыаланы тэрийдэ.
Быһылаан буолбут сиригэр старшай силиэдэбэтэл уонна силиэдэбэтэл-криминалист үлэлээтилэр. Кинилэр быһаарбыттарынан, 50 саастаах дьахтар уонна 46 саастаах эр киһи дьиэ хаһаайыттара буолаллара биллибит. Бу дьон баһаартан буолбакка, эттэригэр-сииннэригэр быһаҕынан анньан өлөрүү суоллара баарын быһаарбыттар.
Биллибитинэн, сэтинньи 4 күнүн түүнүгэр уорбаланааччы 58 саастаах эр киһи бу ыалга кэлэн арыгы иһиспит. Арыгы иһии кэмигэр дьиэлээх хаһаайынныын тыл тылларыгар киирсибэккэ кыыһырсыбыттар. Ол түмүгэр уорбаланааччы быһаҕынан кэйгэллээн өлөрбүтэ билиннэ диэн СӨ Силиэстийэлиир кэмитиэтэ иһитиннэрэр.
Ульяна Захарова, «Саха сирэ» хаһыат, edersaas.ru
Хаартыска — news.ykt.ru