Кэлиҥҥи кэмҥэ үгүс киһи тэйиччиттэн үлэҕэ олорорунан сибээстээн, куйаар ситиминэн үлэ көрүҥэ салайааччылары да, дьону-сэргэни да интэриэһиргэтэрэ улаатта.
edersaas.ru
Бүгүн киэһэ 19 ч. Амма улууһун баһылыга Николай Архипов уонна Нам улууһун баһылыга Юрий Слепцов инстаграмынан биир дойдулаахтарын кытта ирэ-хоро кэпсэттилэр.
Олохтоохтор араас ыйытыыны биэрдилэр. Амма улууһун олохтоохторо ититэр ситим трассатын бүрүйүү, ыччаты үлэнэн хааччыйыы, дьэллик ыттар боппуруостарын, сорох нэһилиэктэргэ тыа хаһаайыстыбатын кэпэрэтииптэригэр хамнас төлөнө илигин, куораттыыр уонна нэһилиэктэри кытта сибээстэһэр суоллар хаардарын ыраастааһын туһунан, уо.д.а. ыйытыылары биэрдилэр.
Намнар сүрүнээн сыстыганнаах дьаҥы бохсор үлэни ырыттылар. Ол курдук, КТ аппараатынан улууһу хааччыйар кэм уолдьаспытын, тоҕо харантыын олохтоммотун, эмп сыаната ыараханын, эмчиттэр ыҥырыыга тоҕо өр кэлбэттэрин уо.д.а. ыйыттылар.
Куйаар ситимин нөҥүө улуустар, нэһилиэктэр салайааччылара «быһа биэриинэн» дьону кытта кэпсэтиилэрэ, биллэн турар, үлэлэригэр көдьүүстээҕэ чахчы. Онон атын муниципалитеттарга бу икки улуус салайааччылара олус бэрт холобуру көрдөрдүлэр.
Елена ПОТОЦКАЯ, «Саха сирэ» хаһыат, edersaas.ru