Маны аах Уопсастыба

Амма улууһун Эмис нэһилиэгин киин уулуссатыгар видеокамера турда

Амма улууһун Эмис нэһилиэгин киин уулуссата норуодунай бэйиэт Күннүк Уурастыырап аатын сүгэр. Манна улуус нэһилиэктэриттэн бастакынан онлайн-кэтээн көрүү камераларын туруордулар. Бу камералар нэһилиэккэ киириини уонна тахсыыны кыраҕытык кэтииллэр. Бу үлэ Эмис нэһилиэгэр улууһу кытта тэҥҥэ биллэриллибит “Дьиэ кэргэн экэниэмикэтин сылын” чэрчитинэн ыытылынна. Маныаха нэһилиэк бүддьүөтүттэн 50 тыһыынча солкуобай көрүллүбүтэ.

Нэһилиэк баһылыга Прокопий Бубякин «Амма олоҕор» иһитиннэрбитинэн, бу бырайыак улуустааҕы Полиция отдела (начаалынньык Василий Стрекаловскай) уонна “Ростелеком” улуустааҕы филиалын (начаалынньык Иннокентий Слепцов) кытта бииргэ үлэлэһиилэрин түмүгэр кыалынна. Сайдыылаах арҕааҥҥы дойдуларга видеокамера бэрээдэги кэһиини сэрэтэр биир сүрүн ньыма буолар. Хас биирдии ыал нус-хас олоҕу олоруон баҕарар.

Санатан суруйдахха, Амма улууһун баһылыга Николай Архипов дьаһалынан, 2021 сылы “Дьиэ кэргэн экэниэмикэтин сылынан” биллэрбитин тэҥэ, нэһилиэктэр ортолоругар олус кэскиллээх, социальнай-экэнэмиичэскэй сайдыы-үүнүү күрэхтэһиитин биллэрбитэ. Сыл устата нэһилиэктэр отучча социальнай-экэнэмиичэскэй критерийинэн көрдөрүүтүн тупсарбыт буоллахтарына, үлэ ыыппыт нэһилиэктэр бастакы миэстэҕэ “МТЗ-82” тыраахтарынан, иккис миэстэҕэ УАЗ-массыынанан, үһүскэ “Синтай” тыраахтарынан наҕараадаланыахтара.

Полиция хапытаана Валентинй Барашков: «2021 сылтан «Ростелеком» хампаанньаны кытта үлэлээн саҕалаабыппыт. Улууспут нэһилиэктэригэр оптоволокно киирэн, бэрээдэги кэһии тахсыбатын туһуттан уонна киһи үөйбэтэх өттүттэн тахсар быһыыны-майгыны хонтуруоллаары, барыта 28 камера турбута. Бастакынан икки камераны Эмискэ туруордубут. Холобурдаан эттэххэ, сүөһү сүтүүтэ даҕаны буоллун, барыта манан көстө турар. Итиэннэ дьон барыыта-кэлиитэ, түүннэри сылдьыы эмиэ хонтуруолга ылылынна. Профилактикаҕа үчүгэй», — диэн санаатын үллэстэр.

edersaas.ru

4
0
Telegram @edersaas20