Туймаада ыһыаҕа аһыллыытын кэнниттэн, улуустар түһүлгэлэригэр омук сириттэн кэлбит ыалдьыттары көрүстүлэр.
Аммалар бэйэлэрин түһүлгэлэригэр бэрт элбэх ыалдьыты көрсөн, Саха сирин олохтоохторо ыалдьытымсахтарын көрдөрдүлэр. Бу туһунан баһылыгы социальнай боппуруостарга солбуйааччы Саргылаана Борисова кэпсээтэ:
— Амма түһүлгэтигэр ыһыаҕы аһыы сиэрин-туормун кэнниттэн Узбекистантан 11 мадьыныны, Ирантан сылдьар спортсменнары, Индияттан «ЮНЕСКО шедеврдэрэ» тэрээһин кыттыылаахтарын көрүстүбүт.
Узбекистантан кэлбит ыалдьыттар биэс кыайыылаахпыт диэн үөрүүлэрин үллэһиннилэр. Ираннар ыһыах аһыллыытын сөҕө-махтайа көрбүттэрин кэпсээтилэр. «Алгыс ылан, үөрүүбүт улаатта», — диэтилэр. Мадьынылар бары олус астынан, биһигини кытта ирэ-хоро кэпсэтэн, хас да чаас остуолбутугар олорон тото-хана аһаан тарҕастылар.
Индияттан сылдьар ыалдьыттарбыт «эһиэхэ күҥҥүт наһаа чугас буолан, олус күүскэ тыгар эбит. Тириибитин быһа сиэттибит. Биһиэхэ күн наһаа маннык күүскэ тыкпат. Сахалар үгэскитин өбүгэ саҕаттан илдьэ сылдьар, күүстээх, ураты норуот эбиккит», — диэтилэр.
Онон күнтэн хаххаланан, индустар наар күлүктээх сири була сатаатылар.
Ыалдьыттарбыт Туймаада ыһыаҕын олус сөбүлээтилэр, ыалдьытымсах Амма улууһун түһүлгэтигэр сылдьан, астыммыттарын биллэрдилэр.
Елена ПОТОЦКАЯ, «Саха сирэ» хаһыат.
Хаартыскалар Саргылаана Борисова тиксэриилэрэ.