Амма улууһун мадьынылара — спорт кулууптар бастакы күрэхтэһиилэрин кыайыылаахтара
Бэҕэһээ, тохсунньу 20 күнүгэр, Манчаары Баһылай аатынан спорт национальнай көрүҥнэрин киинигэр мас тардыһыытыгар «Офсет» тэрилтэ Кубогар спорт кулууптарын икки ардыларыгар аһаҕас турнир буолла.
Маннык хабааннаахтык аан бастакытын ыытыллыбыт күрэхтэһиигэ аҕыс кулууп күрэс былдьаста. Хамаандаттан биэстии мадьыны 60 кг, 70 кг, 80 кг, 90 кг диэри уонна 90 кг үөһэ ыйааһыннарга күөн көрүстүлэр.
Сытыы киирсиилэр түмүктэринэн бастакы миэстэни «Амикан» кулууп ылла. Биллиилээх мадьыны Анатолий Баишев эрчийэр уолаттара «Офсет» тэрилтэ генеральнай дириэктэрэ Алексей Скобелев олохтообут Кубогынан итиэннэ 100 000 солкуобайдаах харчынан бирииһинэн наҕараадаланнылар.
Кыайыылааҕы быһаарар сүрдээх тыҥааһыннаах киирсиигэ аммаларга 2:3 ахсаанынан баһыйтарбыт Хотугуу-Илиҥҥи федеральнай университет хамаандата (тириэньэр Егор Кудрин) пьедестал иккис үктэлин дабайда.
Иван Белолюбскай салайар «Боотур» кулууба үһүс бириистээх миэстэни ылла.
Алексей Скобелев, «Офсет» тэрилтэ салайааччыта, күрэхтэһии тэрийээччитэ, мас тардыһыытыгар өрөспүүбүлүкэтээҕи федерация вице-бэрисидьиэнэ:
—Быйыл уруккуттан иитиэхтии сылдьыбыт санаабытын олоххо киллэрэн, Манчаары Баһылай аатынан спорт национальнай көрүҥнэригэр киин (дириэктэр Иннокентий Григорьев) быһаччы көмөтүнэн кулууптар икки ардыларыгар күрэхтэһиини тэрийэн ыыттыбыт. Онтон бастатан бэйэм сүрдээҕим астынным. Инникитин бу күрэхтэһиини үтүө үгэскэ кубулутан сыллата ыытар баҕалаахпыт.
Бу түһүлгэҕэ Арассыыйа НА СС Хотугу сир кыһалҕаларын үөрэтэр физико-техническай институтун учуонайдара, мас тардыһыы фанаттара Михаил Уваров, Василий Ефимов уонна Егор Петров айан оҥорбут старт массыыналарын боруобалаан көрдүбүт. Саҥа аата саҥа, итэҕэһэ-быһаҕаһа ханна барыай. Ол эрээри биир бэйэм сүрдээҕин сэҥээрдим. Силигэ ситтэҕинэ, инникилээх тэрил дии санаатым.
Роман ПОПОВ, «Саха сирэ» хаһыат, edersaas.ru
Ааптар хаартыскаҕа түһэриитэ.