Амма улууһун баһылыга Николай Архипов быыбар түмүгүнэн иккис болдьоххо талылынна
Бэҕэһээ, балаҕан ыйын 13 күнүнээҕи быыбар түмүгүнэн, «Биир ньыгыл Арассыыйа» баартыйаттан турбут Николай Архипов 4896 (56,96%) куолаһы ылан кыайда. Быыбарга бэйэтэ турбут Михаил Артемьев 3614 (42,04%) ылла.
edersaas.ru
Николай Архипов муус устар 26 күнүгэр 1969 сыллаахха Саха АССР Амма улууһун, Амма сэлиэнньэтигэр төрөөбүтэ. 1991 сыллаахха Благовещенскайдааҕы тыа хаһаайыстыбатын институтун «Ветеринария» идэтин бүтэрбит. 2007 сыллаахха «Институт при Президенте Республики Саха (Якутия)» үөрэнэн «Судаарыстыбаннай уонна муниципальнай салайыы” идэтин, 2011 сыллаахха РФ бэрэсидьиэнин иһинэн РАНХиГС «Судаарыстыбаннай сулууспа персоналын салайыы» идэтигэр үөрэммит. 2015 сыл кулун тутар 15 күнүгэр Амма улууһун баһылыгынан талыллыбыт.
Николай Архипович edersaas.ru кэрэспэдьиэнигэр комментарий биэрдэ:
— Быыбар иннинээҕи агитация биэс нэдиэлэ кэриҥэ ыытыллыбыта. Улуус нэһилиэктэригэр, тэрилтэлэргэ, түөлбэлэргэ хастыыта да сырыттыбыт. Миэхэ итэҕэйэн куоластаабыт дьоҥҥо махталбын тиэрдэбин.
Чугастааҕы сыаллар: социальнай эбийиэктэрбитин үлэлэтии, суолбутун оҥоруу, эргэрбит уот ситимин саҥардыыга 110 киловаттаах уот киириитэ. Бары хайысхалары бииргэ тутан Амма улууһун сайыннарарга үлэни ыытар былааннаахпыт. 2024 сылга Олоҥхо ыһыаҕа ыытыллыахтаах, онно бэлэмнэниэхпит. Уонна биллэн турар, айылҕабытын харыстааһыҥҥа күүстээх үлэни ыытыахпыт.
Виктория Бястинова.
Хаартыска СИА.