Бүгүн, ыам ыйын 31 күнүгэр, суһал ыстаап салайааччытын солбуйааччы Ольга Балабкина быһа сибээскэ тахсан өрөспүүбүлүкэҕэ уопсай балаһыанньаны билиһиннэрдэ.
Ол курдук, Саха сиригэр билигин даҕаны балаһыанньа уустугун, коронавирустан хааччахтаныы миэрэлэрин СӨ Ил Дархана Айсен Николаев бэс ыйын 15 күнүгэр диэри уһаппытын иһитиннэрдэ. Бүтэһик сууккаҕа өрөспүүбүлүкэ үрдүнэн 100 киһи коронавирус дьаҥар хаптарбыт. Онтон 64 киһи Дьокуускайга ыалдьыбыт. Мэҥэ Хаҥаласка ыалдьааччы ахсаана аччаабыт. Ол оннугар, Амма улууһугар эбиллибит.
Ыалдьар дьон ахсаана стационарга элбээбитин, сууккаҕа 1682 анаалыс оҥоһуллубут эттэ. Билигин Дьокуускайга үс көрүҥ вакцинаны поликлиникаларга, анал пууннарга биэрэллэрин кэпсээтэ. Мэҥэ Хаҥалас, Хаҥалас улуустарыгар бу үс көрүҥ вакцина тиэрдиллибит.
«Манчаары оонньууларын» көрсө Горнай улууһугар эбии баартыйа вакцина тиийбит да, олохтоохтор вакциналаныылара бытаанын бэлиэтээтэ. Успуорт оонньууларын көрсө бары тэрийээччилэр, кыттааччылар дьаҥы утары вакциналаныахтаахтар диэн иһитиннэрдэ.
Ульяна Захарова.