СӨ бырабыыталыстыбатын бэрэссэдээтэлэ Андрей Тарасенко Амма улууһугар бу сыл бүтүөр диэри тыһыынча туонна киирэр бурдук хаһаанар сир тутуллуоҕун туһунан иһитиннэрдэ. Кини бэс ыйын 29 күнүгэр Амма улууһугар үлэлээбитэ.
Улуус баһылыга Николай Архипов иһитиннэрбитинэн, бу анал тутуу бурдугунан дьарыктанар “Амма” АУо тутуллуохтаах. Санатан эттэххэ, “Амма” АУо улуус биир тутаах тэрилтэтэ буолар. “Премьер-миниистир улууспутугар бу иннинэ кэлэн барыытыгар боппуруоһу көтөхпүппүтүн өйөөбүтэ. Быйыл биһиги бааһыналарбытыгар барытыгар бэйэбит бурдукпутун ыстыбыт. Былырыын хаһааҥҥытааҕар да өлгөм үүнүүнү ылбыппыт”, – диэн иһитиннэрэр кини.
Премьер-миниистир Андрей Тарасенко бэлиэтээбитинэн, Аммаҕа тыа хаһаайыстыбатыгар улахан мунньах ыытылынна. Илин эҥэр улуустар баһылыктара бары кытыннылар.
– Тыа хаһаайыстыбатын боппуруостарыгар быһа сибээһинэн илин эҥэр улуустары барыларын мунньан улахан мунньах ыыттыбыт. Бу эйгэҕэ туох кыһалҕа баарын ырытыстыбыт. Үүтү соҕотуопкалааһыҥҥа этиилэр киирдилэр. Биһиги көрөрбүтүнэн билигин бороһуок үүтү оҥорууга эмиэ болҕомто ууруллуохтаах. Иккиһинэн, агростартап куонкуруһун үбүлээһинин көрүөхпүт, – диэн иһитиннэрэр.
Амма улууһугар сыһыаран бырабыыталыстыба бэрэссэдээтэлэ ыҥырыанан дьарыктанар предпринимателлэргэ көмө барыаҕын туһунан иһитиннэрдэ. Ону таһынан түргэнник ситэр дьиэ кыылын иитиигэ көмө барыахтаах. Санатан эттэххэ, быйыл тыа хаһаайыстыбатыгар барытыгар бүддьүөттэн 13 млрд солкуобай көрүллэн турар.
Аграфена КУЗЬМИНА