Уопсастыба

Амма улууһугар Булуҥ саҥа уулуссаланна

Амма улууһугар Булуҥҥа (Покровка таһыгар) саҥа уулусса баар буолла.

Бу саҥа уулуссаҕа Амма улууһугар элбэх үлэни тэрийбит, тыа хаһаайыстыбата, тыа сирэ сайдарын туһугар турууласпыт Максим Сибиряков аата иҥэрилиннэ.
Маныаха Булуҥҥа «Уһук Илин гектар» бырагырааматынан саҥа уулуссалар баар буоллулар, бүгүҥҥү күн туругунан 54 киһи сир ылбыт диэн ulus.media иһитиннэрэр. Мемориальнай дуоска от ыйын 13 күнүгэр арыллыбыт.
1978 сыллаахтан Амма улууһугар быраҕыллыбыт нэһилиэктэри сөргүтүү үлэтэ саҕаламмыта. 1980 сыллаахха ССКП оройуоннааҕы кэмитиэтин бастакы сэкирэтээрэ Максим Сибиряков көҕүлээһининэн, тыа хаһаайыстыбатын сайыннарар сыаллаах сири туһаҕа таһаарыыга комсомольскай ыҥырыы тахсыбыта. XXX уобаластааҕы комсомольскай кэмпириэнсийэҕэ өрөспүүбүлүкэҕэ күргүөмнээх комсомольскай үлэ саҕаламмыта биллэриллибитэ. Комсомол кэмитиэтинэн тэриллибит этэрээттэр үлэҕэ ыҥырыллыбыттара.
Ол түмүгэр, Саха сирин араас муннуктарыттан 1984 сыллаахха 54 комсомол чилиэнэ үлэлии тиийбитэ. Кинилэр быраҕыллыбыт нэһилиэктэри сөргүтэн, «Амма» сопхуос дохсун үлэлээх отделениеларынан буолуохтаахтарыгар сыал-сорук туһаайыллыбыта. Кыргыттар уонна уолаттар пиэримэҕэ, сир үлэтигэр көхтөөхтүк үлэлээбиттэрэ, бөһүөлэги туппуттара. Кэнники Крымтан дьиэ кэргэттэр тиийбиттэрэ. «Үөрэбин. Дьокуускайга куоракка балыыһаҕа сыттахпына, аммалар сонуннарынан үөртүлэр. Мээндигигэ кыраайы үөрэтэр түмэлгэ мин ааппын иҥэрбиттэр. Итиэннэ Булуҥҥа сүрүн уулуссаҕа эмиэ мин ааппын иҥэрбиттэрэ соһуччу сонун буолла. Булуҥҥа оччолорго оскуола, кулууп, успуорт саалата, маҕаһыын тутуллубуттара. Кэлин сабыллыбытыгар хомойбутум», — диэн Максим Николаевич суруйбут.
Оттон билигин, Булуҥ «Уһук Илин гектар» бырайыагынан чөлүгэр түһэр, саҥалыы тыыннанар.
2
0