«Уһук Илиҥҥи гектар» сокуонун чэрчитинэн, 2019 сылтан саҥа поселениялары төрүттээһин пилотнай бырайыага киллэриллибитэ.
Саха сириттэн бу бырайыакка түөрт бөһүөлэк киирбитэ: Нам улууһугар Партизан, Ньурбаҕа Антоновка, Мэҥэ Хаҥаласка Петровка, Аммаҕа Булуҥ учаастага. Аммаҕа бу хайысханан үлэ-хамнас хайдах баран иһэрин туһунан улуус дьаһалтатын муниципальнай баайы-дуолу салайыыга уонна сиргэ сыһыаннаһыыга кэмитиэтин салайааччы Михаил Трифонов маннык кэпсиир:
– Амма улууһугар барыта 800-тэн тахса сир учаастага бэрилиннэ, билигин да сайаапкалар киирэ тураллар. Сүрүннээн улуус олохтоохторо сир ылаллар, Амматтан төрүттээх атын сирдэргэ олорор дьон эмиэ интэриэһиргииллэр. Хомойуох иһин, киһи барыта сирин туһанар буолбатах, гектар төрүт наадата суох эбит диэччи биирдиилээн да буоллар көстөр. Сир учаастагын эрдэ ылбыт 200-тэн тахса киһи декларация толордо, өссө да бааллар.
Булуҥ учаастагын сөргүтүү бырайыагынан федеральнай тыраассаттан учаастакка диэри саҥа суол оҥоһулунна, электроуот ситимэ тардылынна. Барыта 54 уһаайба бэриллибитэ, уот киирэн, мантан инньэ тутуу күүскэ барыаҕа, билигин номнуо хас да саҥа дьиэ дьэндэйдэ.
Соморсун нэһилиэгэр I Чакыр диэн кииннээһин саҕана сабыллыбыт учаастак баар. Онно сыыспат буоллахпына, Караканов диэн бааһынай хаһаайыстыба олохсуйан сылгы иитэр. Дьэ бу сиргэ Соморсун олохтоохторо отуттан тахса киһи сайылык оҥостоору уһаайба ылбыттарын эмиэ пилотнай бырайыакка киллэртэрдэрбит диэн үлэлэһэ сылдьабыт.
Раиса Сибирякова, «Саха сирэ», edersaas.ru