Маны аах Тыа хаһаайыстыбата

Амма улууһа сиилэскэ, сенажка былаанын аһары толордо

Быйыл сайын төһө да кураан буоллар, сааскы уу нүөлсүтэн итиэннэ бурдук тахсар, от ситэр кэмнэригэр син тэһитэ ардаан, Амма улууһугар от да, бурдук да үүнүүтэ куһаҕана суох.

Оттооһун уонна хомуур туһунан улуус сүрүн агронома Николай Гаврильев маннык кэпсиир:

Биһиги кыстыгы көрсө 32 тыһыынча туонна оту оттуур, 2 тыһыынча 800 туонна сиилэһи угар уонна 1 тыһыынча 500 туонна сенаһы бэлэмниир былааннаах этибит. Балаҕан ыйын 7 күнүнээҕи туругунан, 27 тыһыынча 429 туоннаны оттоон, сорудахпыт 85,7 %-ын толордубут. Маны таһынан 2 тыһыынча 928 туонна сиилэһи, 1 тыһыынча 787 туонна сенаһы бэлэмнээн, сүөһү эбии аһылыгар былааммытын куоһардыбыт. Онон, бэйэбит барыллаан 27 тыһыынча 500 туоннаны оттуохпут диэбиппитин ситиһэр буоллубут. Ыраах учаастактарынан оттуур мобильнай биригээдэлэрбит 3 тыһыынча 451 туоннаны чөкөттүлэр, былааннара 4 тыһыынча 35 туонна этэ. Ити иһигэр икки мобильнай биригээдэ Уус Маайа сиригэр, Нуотараҕа киирэн оттоото – Соморсунтан «Үрүйэ» хаһаайыстыба биригээдэтэ 250 туоннаны оттоон бүтэн таҕыста, оттон Сатаҕайтан Семен Анисимов биригээдэтэ билигин да үлэлии сылдьар, 300 туоннаны оттуур сорудахтаах.

Биирдиилээн нэһилиэктэринэн ылан көрдөххө, былааннарын Маайыскай нэһилиэгэ 116 %, Амма нэһилиэгэ 113 %, Сулҕаччы 99 %, Соморсун 98 %, Эмис 96 %, Амма Наахара 92 %, Мээндиги 91 % толороннор, кыстыыр отторун сүрүннээн хааччыннылар. Арай, Алтан уонна Сатаҕай нэһилиэктэрэ курааҥҥа оҕустараннар, кыраапыктан хааллылар. Отторо тиийбэт хаһаайыстыбалартан сайаапканы хомуйа сылдьабыт, кинилэри хааччыйыыны улууспут иһинэн быһаарарга соруктанабыт.

Раиса Сибирякова, «Саха сирэ», edersaas.ru

0
0