Амма өрүс аттыгар маһы соҕотуопкалааһыҥҥа СӨ уопсастыбаннай палаататын мунньаҕа буола турар
Бүгүн, кулун тутар 14 күнүгэр, үс чаастан СӨ Уопсастыбаннай палаататын көҕүлээһинэн, Саха сиригэр маһы соҕотуопкалааһын боппуруостарыгар, чуолаан Алдан оройуонугар Амма өрүс өрө тардыытыгар маһы кэрдиигэ аналлаах мунньах саҕаланна.
Саала иһэ толору киһинэн туолбута Амма өрүс аттыгар маһы кэрдии боппуруоһа суолтата улаханын кэрэһилиир. Мунньахха киирии тылы СӨ Уопсастыбаннай палаататын бэрэссэдээтэлэ Николай Бугаев эттэ, баар боппуруоһу биир санаанан салайтаран, сөптөөхтүк быһаарарга эттэ. Сүрүн иһитиннэриини Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Сахамин Афанасьев оҥордо. «Мин Амма өрүскэ маһы кэрдиини утарабын, үлэ сокуон быһыытынан салалларыгар болҕомто ууруллуохтаах. Бары билэрбит курдук, РФ Ойуурун кодексата 2006 сыллаахха ылыллыбыта уонна ити кэмтэн ойуур учаастактарын арыандалааһын дуогабара тустаах аукциоҥҥа кыайбыттары кытары эрэ түһэрсиллэр. Итини тэҥэ, маһы соҕотуопкалааһын РФ Айылҕа ресурсаларыгар уонна экологияҕа министиэристибэтэ бигэргэппит Быраабылатынан эрэ ыытыллар. Маһы кэрдии, соҕотуопкалааһын барыта сокуон иһинэн, ирдэбилинэн ыытыллыахтаах», — диэн санаатын үллэһиннэ.
Салгыы баар балаһыанньаны СӨ экологияҕа миниистирэ Евгений Первильев саас-сааһынан быһааран биэрдэ. Кини уопсастыбаннас ыйытыыларыгар сиһилии хоруйдаата. Уопсастыбаннай палаата тэрийбит мунньаҕын түмүгүнэн тустаах боппуруоска резолюция ылыллыаҕа.