Уопсастыба

Амма оҕолоро Санкт-Петербурга кэмпириэнсийэҕэ кытыннылар (Ааҕааччы суруга)



Амма улууһун В.Г. Короленко аатынан 1 №-дээх оскуола үөрэнээччилэрэ Санкт-Петербурга Бүтүн Россиятааҕы научнай-практическай кэмпириэнсийэҕэ ситиһиилээхтик кыттан кэллилэр. Сергей Никитич Захаров уонна Ульяна Николаевна Прокопьева барыта уон оҕону салайан илдьэ сырыттылар.
edersaas.ru

Оҕолор араас интэриэһинэй, дириҥ ис хоһоонноох дакылааттарынан кыттан, дьүүллүүр сүбэ биһирэбилин ыллылар, бириистээх миэстэлэргэ тигистилэр.
“Өй үлэтин сайыннарыы” (Интеллектуальное возрождение) хайысхаҕа 10-с “Б” кылаас үөрэнээччилэрэ Коля Биктеев, Володя Судинов “Кылыс-клинковое оружие средневекового воина саха Боотура” диэн дакылаатынан кыттан, I истиэпэннээх дипломант үрдүк аатын ыллылар. Оттон “Регионнары уонна искусствоны үөрэтии” (Регионоведение и искусствоведение) хайысхаҕа «Керамика археологических культур и горшочное дело народа саха на территории Амгинского района” диэн тиэмэни көмүскээн, эмиэ тустаах кылаас үөрэнээччилэрэ Роза Таныкова, Тома Жиркова II-с истиэпэннээх дипломант буоллулар. Розалаах Томаны история учуутала Ванина Ивановна Захарова салайар. Хас да сыл үгүс сыраларын ууран чинчийбит үлэлэрин түмүгэ үрдүктүк сыаналанан, оҕолор улаханнык үөрдүлэр. Убаастыыр учууталларыгар оҕолор, төрөппүттэр махталлара муҥура суох.
“Техническэй наука уонна моделлааһын” (Технические науки и моделирование) хайысхаҕа 8-с “А” кылаас үөрэнээччитэ Дьулустаан Попов (салайааччылара Сергей Никитич Захаров, Леонид Иннокентьевич Окороков) “Подъемный механизм ворот каркасного гаража” диэн тиэмэнэн II-с истиэпэннээх дипломант аатын сүктэ. Салайааччылара уһуннук дьаныһан бэлэмнээбит сыралара ситиһиилэммититтэн бары да олус астыннылар.
Кэмпириэнсийэ кэнниттэн оҕолор Санкт-Петербург куорат кэрэ миэстэлэринэн экскурсияҕа сырыттылар, араас түмэллэринэн, тыйаатырдарынан дуоһуйа сынньаннылар. Сырдыкка, билиигэ-көрүүгэ уһуйар үтүөкэн учууталларыгар төрөппүттэр, оҕолор махталлара улахан. Амма аатын бүтүн Россияҕа ааттатан үрдүк ситиһиилэнэн кэлбиттэринэн киэн туттабыт, кинилэргэ өссө да үрдүк ситиһиилэри баҕарабыт.

Екатерина ДЬЯЧКОВСКАЯ, СӨ үөрэҕириитин туйгуна, “Саха сирэ” хаһыат, edersaas.ru

0
0

Санааҕын суруй