Таатта улууһун Амма нэһилиэгэр уот ситимэ тардылынна.
Чычымахтар киэн туттар ытык киһилэрэ, Арассыыйа бочуоттаах фермерэ Данил Афанасьев дьон-сэргэ өр күүппүт баҕа санаата туолбутугар, олоххо киирбитигэр махтанан аал уоту оттон алгыс баһын сыалаабыт. Нэһилиэк баһылыга Степан Соров уот ситимин тардар эппиэттээх үлэҕэ кыһамньыларын ууран үлэлэспит бэдэрээччиттэргэ Евгений Винокуровка, Дьулустаан Ноевка («Энергострой-ДВ») махтал суруктары, өйдөбүнньүк бэлэхтэри туттарбыт.
Сиһилии нэһилиэк баһылыга Степан Соров:
—Уот ситимэ урут Амма хочотунан барар этэ. Остуолбаларбыт эргэрэннэр, саас халаан уутугар тирэхтэрэ сууллан, ууга баран хаалаллара. Онон саас, сайын буолла да биир, арыт, икки ыйга тиийэ уота суох олорон эрэйи көрөр этибит. Бу кыһалҕаны туоратаары турууласпыппыт халтайга хаалбата. Аныгы олох ирдэбилигэр эппиэттиир саҥа бырайыагынан Харбалаахтан Чычымахха диэри үрдүк күүрүүлээх уот ситимэ (ВЛ-10) тардылынна. Үлэни «Якутэнерго» АУо уйунна, — диэтэ. ОДьКХ ГУТ инвест бырагырааматыгар киирэннэр, быйыл саҥа хочуол тутуллара былааннанарын, оччотугар кэтэх ыаллар дьиэлэрин холбооһун үлэтэ саҕаланыахтааҕын эттэ.
Оттон нэһилиэк олохтоохторо «Энергострой-ДВ» ХЭУо, «Якутэнерго» АУо, улуус баһылыгар М.М.Соровка, нэһилиэк баһылыгар С.С.Соровка, Ил Түмэн дьокутаатыгар Я.А.Ефимовка болҕомтолорун, кыһамньыларын уурбуттарыгар, ол түмүгэр улахан үлэ ситиһиллибитигэр махталларын тиэрдэллэр.
Умнуллубат долгутуулаах түгэҥҥэ бэдэрээччиттэр: «Энергострой- ДВ» ХЭУо дириэктэрэ Евгений Винокуров, Дьулустаан Ноев, нэһилиэк электригэ Василий Васильев, педагогическай үлэ бэтэрээнэ Владимир Михайлов кыттыбыттар.
Хаартыскалар Амма нэһилиэгин дьаһалтатыттан