Сүрүн Уопсастыба

Амма-Өлүөхүмэ оскуолатыгар хапытаалынай өрөмүөн ыытылынна

Өлүөхүмэ оройуонугар Амма-Өлүөхүмэ орто оскуолатыгар хапытаалынай өрөмүөн ыытылынна.

Өрөспүүбүлүкэҕэ быйыл «Үөрэх систиэмэтин саҥардыы» федеральнай бырагыраама саҕаламмыта. Бу бырайыак иитинэн, Амма-Өлүөхүмэ орто оскуолатыгар хапытаалынай өрөмүөн ыытылынна.

СӨ Ил Дархана Айсен Николаев Өлүөхүмэҕэ үлэтинэн сылдьан бу оскуолаҕа ыалдьыттаата. Манна кини 2019 сыллаахха сылдьыбытыгар, олохтоохтор хапытаалынай өрөмүөнү туруорсан тураллар. Ол түмүгэр, оскуола акылаата, дьиэ үрдэ уларытыллыбыттар, саҥа муосталаммыт, тэриллэр, миэбэллэр саҥардыллыбыттар.

—Манна  сылдьан оскуола хайдах туруктааҕын көрбүтүм. Дойду бэрэсидьиэнэ Владимир Путин «Биир Ньыгыл Арассыыйа» баартыйа сийиэһигэр үөрэх тэрилтэлэрин саҥатытан оҥорууну көҕүлээһининэн, оскуола өрөмүөннэнэн улаханнык уларыйбыт. Бырагыраама иитинэн өрөмүөнү таһынан өссө саҥа тэриллэр, миэбэллэр ылыллаллар. Бу улахан суолталаах. Оттон хаачыстыбалаах үөрэх — дойдубут инники кэскилэ, — диэн этэр Ил Дархан.

Быйыл хапытаалынай өрөмүөн бастакы түһүмэҕэ түмүктэниэхтээҕэ. Иккис түһүмэх 2023 сылга былааннаммыта. Ол гынан баран, бэдэрээччит бастакы түһүмэҕи бүтэрэн баран, бэйэтин үбүгэр-харчытыгар иккис түһүмэҕи саҕалаабыт.

—Бэдэрээччит икки сыллаах бырагырааманы бүтэрэргэ улахан эбэһээтэлистибэ ылыммыт. Бу үлэҕэ эппиэтинэстээх буолууну көрдөрөр, — диэн Айсен Николаев бэлиэтиир.

Улуус баһылыга Николай Харбин  бырагырааманан чугастааҕы сылларга өссө алын сүһүөх кылаастар үөрэнэр оскуолаларыгар хапытаалынай өрөмүөн ыытыллара былааннанарын иһитиннэрдэ. Маны сэргэ, маннык хабааннаах үлэлэр Дьэлгэй уонна Урицкай оскуолаларыгар ыытыллыахтаахтар.

Санатан эттэххэ, өрөспүүбүлүкэ киин куоратын 58 оскуолатыгар уонна 25 улууска федеральнай бырагырааманан хапытаалынай өрөмүөннэр ыытыллаллар. Итинтэн 38 кыһа быйыл, 20 оскуола 2023 сылга өрөмүөннэниэхтээхтэр.

 

Хаартыскаҕа Андрей Сорокин (СИА) түһэриилэрэ

0
0
Telegram @edersaas20