1952 сыллаахха Аммаҕа төрөөбүт Филипп Егорович Лобанов Ийэ дойудутун иннигэр ытык иэһин төлөөн, аармыйаҕа сулууспалыы сылдьан, баһаары умулларыыга сырдык тыынын толук уурбута.
Эдэркээн саллаат өлбүтүн кэнниттэн, хорсун быһыытын сыаналаан, Кыһыл сулус уордьанынан наҕараадалаабыттара. Кини аата Сахалин уобалаһын Росгвардиятын састаабын испииһэгэр үйэ саас тухары киллэрилиннэ.
Филипп Лобанов 1970 сыллаахха аармыйаҕа ыҥырыллан, Сахалин уобалаһыгар 6567 №дээх чааска сулууспалаабыта. 1972 сыллаахха бэс ыйын 2 күнүгэр Стародубскай балык баазатыгар массыына арыытын уонна уматыгын ыскылаата умайан, Филипп сулууспалыы сылдьар чааһа бу баһаары умулларбыта. Филипп уматыктаах бүтэһик буочуканы таһааран истэҕинэ, ыскылаат эстэн, эдэркээн саллаат улахан эчэйиини ылбыта. Филипп ыарахан туруктаах балыыһаҕа киирбитэ уонна күн сириттн букатыннаахтык барбыта.
Филипп Лобанов хорсун быһыытын биир дойдулаахтара уонна Стародубскай олохтоохторо умнубаттар. Стародубскайга уонна төрөөбүт Амматыгар кини аатынан уулуссалар ааттаммыттара. Сахалинскай уобалас национальнай гвардиятын батальонун олбуоругар Филипп Лобанов паамытынньыга кини аатын үйэлэргэ ааттата турар. 2019 сыллаахха Южно-Сахалинскайга ыытыллыбыт бастакы кыһыҥҥы “Азия оҕолорун оонньууларыгар” Саха сириттэн барбыт дэлэгээссийэ бу пааматынньыкка сибэккии дьөрбөтүн уурбута.
Дьоруойдар ааттара хаһан да умнуллубат.
Ньургуйаана Иванова, “Cаха сирэ” хаһыат, edersaas.ru
Саха өрөспүүбүлүкэтин Уһук Илиҥҥэ бэрэстэбиитэлистибэ ыыппыт хаартыскалара