Амма хаһаайыстыбалара тыраахтардары туттулар

Бөлөххө киир:

Амма улууһун “Абаҕа”, “Соморсун”, “Болугур”, “Үрүйэ”, “Кэскил”, “Бөтүҥ” тыа хаһаайыстыбатын тэрилтэлэрэ, Лукин аатынан кэпэрэтиип МТЗ-82 саҥа тыраахтардары туттулар.

Тыа хаһаайыстыбатын министиэристибэтэ иһитиннэрбитинэн, быйыл сүөһүгэ-сылгыга аһы-үөлү бэлэмнээһиҥҥэ өрөспүүбүлүкэ бүддьүөтүттэн 8,5 мөлүйүөн солкуобай, муниципальнай бүддьүөттэн 11,2 мөлүйүөн солкуобай ыытыллара былааннанар.

Бу үп сэттэ МТЗ-82 тыраахтары ылыыга (14,7 мөл.солк.), ыһыыга 210,6 туонна сиэмэни атыылаһыыга (14,7 сол.солк.) барыаҕа.

Тыа хаһаайыстыбатын миниистирин бастакы солбуйааччы Петр Попов бэлиэтээбитинэн, Амма улууһа быйыл 4178,7 га иэннээх сиргэ сүөһү сиир бурдугун ыһарга, 4400 туонна сиилэһи, сенаһы бэлэмнииргэ, 210,6 туонна сиэмэни атыылаһарга эбээһинэстэнэр.

«Развитие кормопроизводства» бырагыраама бэһис сылын үлэлиир, сыллата 200 мөл.солк. үбүлэнэр. Быйыл 19 улуус бу бырагыраамаҕа кытынна, өрөспүүбүлүкэ бүддьүөтүттэн 100 мөл.солк., кыттыгас муниципальнай үбүлээһинтэн 135 мөл.солк. көрүлүннэ.

Былырыын 16 улуус бу бырагыраамаҕа кыттыбыта. Уопсайа 2000 туонна батар 6 сиилэс дьаамата хаһыллыбыта, 9 оту хаһаанар, харайар сир, 275,8 күрүө тутуллубута, 675 га быраҕыллыбыт бааһына сөргүтүллүбүтэ. 118,3 мөл. солк. суумаҕа 12 тыраахтар, 2 комбайн, 3 комбикорму оҥорор кыра собуот, 100 анал тиэхиникэ ылыллыбыта.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0