Амма эбэ кытылыгар эдэр уустар өйдөбүнньүк бэлиэни оҥорон туруордулар. Манна кынталдьыйбыт кыталыктар болҕомтону ыраахтан тардаллар.
Бу Таатта улууһугар, Уус Амма нэһилиэгэр, Амма эбэ кытылыгар кырасыабай кыталыктарга анаммыт өйдөбүнньүк бэлиэ соторутааҕыта туруорулунна. Маны уран тарбахтаах уустар Семен Хоютанов уонна Радислав Евлев чочуйан таһаарбыттарын туһунан СИА иһитиннэрэр. Семён тыа хаһаайыстыбатын үлэһитэ, Радислав үлэ уруогун учуутала.
Уустар төрөөбүт дойдуларыгар бэлэхтэрэ биэс миэтэрэ кэриэтэ үрдүктээх. Матырыйаала — массыына куузаба. Бу кэрэ бэйэлээх уран чочуйууну Амма эбэ кылыгырас уутунан устан ааһар дьон кэрэхсии, сэргии көрүөхтэрэ, алгыс ылыахтара диэн этэллэр. «Эдэр дьон дьоһун бэлэхтэрэ төрөөбүт дойдуга, ураты нарын айылҕатыгар, кэрэ-мааны кыылыгар-сүөлүгэр, көтөрүгэр-сүүрэригэр хаһан да уҕараабат дириҥ тапталы, харыстабыллаах сыһыаны көрдөрөр. Ону сэргэ, бу Ийэ дойдуга бэриниилээх буолууну кэрэһилиир«, — диэбит нэһилиэк баһылыгын солбуйааччы Петр Колодезников.
Маны сэргэ, маастардар салгыы үлэлиир былааннаахтарын, 2025 сылга Тааттаҕа ыытыллар Манчаары Оонньууларыгар элбэҕи оҥорор баҕалаахтарын иһитиннэрбит. Уустар төрөөбүт сирдэрин-уоттарын киэргэтэргэ бэлэмнэрэ, өрөспүүбүлүкэ улуустарыттан ыалдьыттыы кэлэр дьон ураты оҥоһуктары, чочуйуулары кэрэхсии көрөллөрүн туһугар айар-тутар улахан баҕалаахтара үөрдэр.
+1
+1
+1
+1
+1
+1
+1