Судаарыстыбаннай Дуума дьокутаата Галина Данчикова бу күннэргэ өҥ буордаах Аммаҕа сырытта.
Амма-Нахаара нэһилиэгин олохтоохтортун сүрүн кыһалҕалара үрдүк күүрүүлээх уот ситимин кыамтатын 35 кВттан 110 кВт тиийэ күүһүрдүү буолар. Тыа хаһаайыстыбатынан дьарыктанар дьоҥҥо бородууксуйаны астыырга-таҥастыырга электроуот кыамтата улахан буолуон наада.
— Улахан кыамталаах ситими тардыы нэһилиэнньэ олоҕун таһымын үрдэтиэҕэ, үлэ саҥа көрүҥнэрин тэрийэргэ тирэх буолуоҕа, – диэтэ Галина Данчикова нэһилиэнньэни кытары көрсүһүүгэ.
Норуот дьокутаата Өнньүөскэ 2020 сылтан федеральнай үбүнэн тутуллар 75 миэстэлээх оҕо саадыгар сырытта. Сүрүн бэдэрээтчит «Ярус» ХЭТ бэрэстэбиитэлэ Сурен Яйлоян этэринэн, тутуу кыраапык быһыытынан баран иһэр, оҕо саада сыл бүтүүтэ үлэҕэ киллэриллиэхтээх.
Болугур нэһилиэгэр «Амма» ТХПК үүт собуотун туттубут, ол үбүн аҥаарын эрэгийиэн бүддьүөтэ уйуммут. Билигин кэпэрэтиип сылга 5 000 туонна үүтү тутан үрүҥ ас арааһын астыыр.
Улуус хаһаайыстыбатын салайааччылара нолуок үрдүгэ сайдыыны харгыстыырын бэлиэтээн тураннар, нолуокка чэпчэтии оҥоһулларын туруорсарыгар дьокутааттан көрдөстүлэр, ирдэнэр докумуоннары оҥорон түһэрэ охсуох буоллулар.
Ойуур баһаардарын туһунан кэпсэтиигэ, туһаныллыбат сирдэр кур лаҥхалара уот туруутугар быһаччы төрүт буоларынан өртөөһүнү сөргүтэргэ эттилэр. Галина Данчикова учуонайдары кытыннаран туран өртөөһүн наадатын туһунан бастаан Ил Түмэҥҥэ быһаарыы ылыллыан наада, ол эрэ кэнниттэн боппуруос салгыы хамсатыллыан сөп диэтэ.
Покровка олохтоохторо саҥа врачебнай амбулатория тутулларын уһуннук кэтэспиттэр. Амбулатория дьиэтэ баар буолбутун кэнниттэн аны быраас көстүбэккэ, сэбиэдиссэй эбээһинэһин акушерка Анна Радлина толоро сылдьар. «Айылҕабыт кэрэ, Амма өрүс үрдүгэр тутар, олорор-үлэлиир усулуобуйа баар, бырааһы кэтэһэбит!», – диир кини.
Нэһилиэнньэны кытары көрсүһүүгэ улуус баһылыга Николай Архипов 44 №-дээх федеральнай сокуоҥҥа, судаарыстыбаннай уонна муниципальнай наадыйыыга анаан табаары, үлэни уонна өҥөнү атыылаһыы эйгэтигэр, кэккэ уларытыылары киллэрэр ирдэнэрин эттэ. Олохтоохтор биэнсийэни үрдэтии, тыа сирин территорияларын сайыннарыы, Киренскэй аатынан лицей-оскуолаҕа саҥа дьиэни тутар туһунан эттилэр. Партизанскай уулусса 89 №-рин олохтоохторо 2010 с. экспериментальнай бырайыагынан тутуллубут дьиэ олус тымныы буолан, Галина Данчикова Бырабыыталыстыба бэрэссэдээтэлинэн үлэлии олорон, саҥа дьиэни тутарга быһаарбытын санатаннар, сылаас дьиэ иһин махталларын биллэрдилэр
Дьокутаат салгыы аптекаҕа, Киин балыыһа поликлиникатыгар сырытта. Санатан эттххэ, поликлиника саҥа дьиэтин тутуута доруобуйа харыстабылын бастакы сүһүөх тэрилтэтин саҥардыы өрөспүүбүлүкэтээҕи бырагырааматыгар киллэриллэн турар.
Андрей Михайлов