Амма булчуттара мунньахтаан, улуустааҕы уопсастыбаларын сөргүттүлэр
Амма сэлиэнньэтигэр бээтинсэҕэ Култуура киинин толору булчуттар муста сырыттылар. Кинилэр Амма улууһунааҕы булчуттар уонна балыксыттар уопсастыбаларын үлэтин саҥалыы сөргүтэр боппуруоһу дьүүллэстилэр. Ыраах нэһилиэктэртэн боломуочуйалаах дэлэгээттэри ыыппыттар. Инньэ гынан, мунньах үлэтигэр 200-тэн тахса киһи кытынна.
edersaas.ru
Улуус салалтатыттан уонна Дьокуускайтан туһааннаах тэрилтэлэртэн эмиэ ыалдьыттар сырыттылар: Экология министиэристибэтин булт хаһаайыстыбатыгар управлениетыттан бэрэстэбиитэлэ Анатолий Попов, Саха сирин булчуттарын уонна балыксыттарын уопсастыбаларын сойууһун бэрэссэдээтэлэ Закира Иванова. Онон мунньах таһымнаахтык, аһаҕастык ыытылынна. Сүүрбэттэн тахса киһи ыйыталаста, санаатын этиннэ.
Амма улууһугар булт билиэттээх 2 тыһыынчаттан тахса киһи баар диэн ааҕаллар. Мунньах кыттыылаахтара улуустааҕы булчуттар уонна балыксыттар уопсастыбаларын бэрэссэдээтэлинэн Виктор Владимирович Смирниковы таллылар. Мантан инньэ аны нэһилиэктэрдээҕи уопсастыбалары хаттаан сөргүтэр былааннаах тарҕастылар.
Василий НИКИФОРОВ, edersaas.ru