Бу күннэргэ Амма улууһун Болугурдааҕы турбазаҕа “Содействие” СӨ уус-уран салайааччыларын уопсастыбаннай түмсүүтэ үһүс төгүлүн тыа сирин кулууптарын үлэһиттэрин түмэн “Үс күн, икки хонук” диэн бырайыагы үлэлэттэ.
Бу туһунан Ньурба Чуукаарыттан уопсастыбаннай кэрэспэндьиэммит Сэргэн Лэкээрин иһитиннэрэр:
— Бырайыак ааптара Андрей Сивцев тыа сирин кулууптарын саҥа сүүрээҥҥэ өбүгэ үгэһин сүтэрбэккэ саҥа олох тэтиминэн үлэлээһиҥҥэ, дьону түмүүгэ, саҥа саҕахтары арыйарга күүс-көмө буолууга, санааны үллэстиигэ туһаайбыт сонун сүүрээнэ айар дьону олус кынаттыыр тэрээһин.
Маҥнай утаа Амма сиригэр үктэнээт Болугурдааҕы култуура киинин үлэһиттэрэ саха сиэрин-туомун тутуһан, сыалаах алаадьынан айах тутан күндүлээн, хомустаан, кулууп дириэктэрэ алҕаан, киирии тыллаах көрсөн, кэлбит дьон кутун-сүрүн түмэ тарта. Баазаҕа олохтообуттарын кэннэ, кутаа тула аһаҕас кэпсэтии, санаа атастаһыыта буолла.
Иккис күн Амма, Уус Алдан, Эбээн Бытантай, Горнай, Хаҥалас, Чурапчы, Дьокуускай, Таатта, Ньурба улуустарыттан кэлбит ыалдьыттарга анаан «Идэни үрдэтиигэ сонун сүүрээн оскуолата» сэминээр буолла. Үһүс күммүтүгэр Болугур кэрэ миэстэлэригэр ыалдьыттаан, дьэдьэннээн баран тарҕастыбыт.
Бу саҥа сүүрээн оскуолатын иһинэн уус-уран салайааччылар үһүс сылбытын түмсүөхпүтүттэн ыла, бары биир кулууп үлэһиттэрин курдук тэрээһиннэри ыытарга бэйэ-бэйэҕэ күүс-көмө буолабыт. Бу маннык идэбитин үрдэтиигэ туһуламмыт түмсүүбүт өссө да сайда туруоҕа диэн бигэтик эрэнэбит. Эһиил бу тэрээһин Хаҥалас улууһугар ыытыллыаҕа.
… Ити курдук, айар куттаах дьону түмэр уопсастыбаннай түмсүүлэр олоҕу хамсатыыга олус суолталаах үлэни ыыталлар.
Елена ПОТОЦКАЯ, “Саха сирэ” хаһыат, edersaas.ru
Хаартыска Сэргэн Лэкээрин тиксэриитэ.