Саха сирин спортивнай оонньууларыгар үрүҥ халааттаах аанньалларбыт күнүстэри-түүннэри үлэлииллэр.
Амма улууһун кылаабынай бырааһа Михаил Архипов иһитиннэрбитинэн, спартакиада кэмигэр 27 медицинскэй пуун түөрт сменанан туох баар күрэхтэһии буола турар сирдэринэн үлэлии сылдьаллар.
Улуус киин балыыһатын 200-чэ үлэһитэ: 120 сиэстирэ, туох баар быраастар уоппускаҕа сылдьар дьон бары тахсыбыттар. Күн устата спортсменнар туруктарын, хааннарын баттааһынын бэрибиэркэлииллэр. Онтон өскөтүн туох эмэ ыксаллаах быһыы-майгы буолар түгэнигэр «суһал» көмө биригээдэтин туруорбуппут, онно эрийэн биллэрэллэр. Маны таһынан трассаҕа Амма кыраныыссатыгар туох баар көмөнү барытын оҥорор кыахтаах анал биригээдэ от ыйын 1 күнүттэн 9 чыыһылатыгар диэри эмиэ күннэри-түүннэри дьуһуурустубалыыр, рация нөҥүө сууккаҕа үстэ сибээскэ тахсар.
Туох-баар пууннар сууккаҕа хаста да сибээскэ тахсан дааннайдары биэрэ олороллор. 3 реамобиль, 15 санитарнай массыына, ону таһынан 5 оройуонтан биир идэлээхтэрбит реамобилларын илдьэ көмөҕө кэлбиттэрэ. Маны тэҥэ от ыйын 2 күнүттэн медицина катастроф кэлэн үлэлии сылдьар. 5 куойкалаах стационарнай госпиталь баар. Кинилэр эмиэ күрэхтэһии түмүктэниэр диэри манна үлэлииллэр. 20 спортивнай быраас кэлэн күрэхтэһии кэмигэр спортивнай объектарга үлэлии олороллор. Бүгүҥҥү күҥҥэ от ыйын 2 чыыһылатыттан 300-чэ обращение киирдэ. Информационнай штабка информация киирэ турар. Үрүҥ халааттаах аанньаллар үлэлэрин доруобуйа харыстабылын миниистирин бастакы солбуйааччы Егор Спиридонович Прокопьев сүрүннүүр. Амма стадиоҥҥа сменаларын кэмигэр фелдьшер кыргыттар бэлисипиэдинэн сылдьан стадиону эргийэ сылдьан көрөллөр. Стадион улахан онон, көмө наада буолла даҕаны түргэнник тиийэр гына икки бэлисипиэт биригээдэтин тэрийбиппит.