Амма улууһун Абаҕа сэлиэнньэтигэр оскуола-уһуйаан бастакы сыбаайатын түһэрдилэр
Бүгүн, балаҕан ыйын 2 күнүгэр, Амма улууһун Абаҕа сэлиэнньэтигэр 225 миэстэлээх оскуола-уһуйаан бастакы сыбаайатын түһэрэр үөрүүлээх тэрээһинэ буолла. Тутуу инвестиционнай бырагырааманан барыаҕа.
А.Е. Кралин аатынан Абаҕа орто оскуолата агротехнологическай хайысхалаах биридимиэттэри эбии үөрэтиигэ идэтийэр. Күн бүгүн 11 кылаас-кэмпилиэккэ 134 оҕо үөрэнэр. Быйыл оскуоланы 18 оҕо бүтэрбит, онтон тоҕуһа үөрэхтэрин туйгунунан түмүктээбиттэр.
Нэһилиэк олохтоохторугар саҥа оскуола-уһуйаан тутуута кэтэһиилээх, үөрүүлээх түгэнинэн буолар. Билигин оҕолор 1971 сыллаахха тутуллубут мас, эргэ дьиэҕэ үөрэнэ олороллор. Маныаха оскуола эргэ дьиэтин аҥаара, саахалланар туруктааҕынан сабыллан турар. Физкултуура уруога уонна спорт сиэксийэлэр нэһилиэк спортивнай саалатыгар буолаллар.
Аныгы оскуола-уһуйаан бастакы сыбаайата түһүүтүгэр, Амма улууһугар оробуочай сырыытынан сылдьар СӨ Ил Дархана Айсен Николаев кытынна.
Кини, Абаҕаҕа оскуола тутуутун туһунан 2018 сыллаахха быһаарыы ылыныллыбытын бэлиэтээтэ. Оччолорго Айсен Николаев нэһилиэккэ кэлэ сылдьан оҕолор хайдах усулуобуйаҕа үөрэнэллэрин көрөн, оскуола тутуутун чугастааҕы кэмҥэ туруоралларыгар сорудахтаабыта. Икки сыл иһигэр бырайыактыыр-симиэтэлиир докумуонун бэлэмнээбиттэр, судаарыстыбаннай эспэртиисэ бигэргэтэр түмүгү биэрбит.
“Оскуола тутуута — үөрэх дьылын саҕаланыыта тутуллубута бэлиэ. Номнуо 2021 сылга оҕолорбут саҥа оскуолаҕа барыахтара уонна ситиһиигэ хардыыларын саҕалыахтара. Биһиги талааннаах оҕолорбут ааттара бүтүн дойдуга иһиллэригэр эрэнэбин”, — диэн Айсен Николаев эрэлин тиэртэ.
Өр күүппүт-кэтэспит оскуолалара тутуллан эрэриттэн Абаҕа нэһилиэгин уонна бүтүн улуус олохтоохторун аатыттан Амма улууһун баһылыга Николай Архипов өрөспүүбүлүкэ салалтатыгар махталын тиэртэ. “Үлэ кэмигэр үмүрүтүллэригэр уонна Айсен Сергеевич эппитин курдук, кэлэр сыл бүтүүтэ саҥа оскуола-уһуйаан тутуутун малааһынныырбытыгар эрэнэбит”, — диэн улуус баһылыга Абаҕа нэһилиэгин олохтоохторун тутуу саҕаланыытын өйүүллэригэр уонна субуотунньуктарга көхтөөхтүк кытталларыгар ыҥырда.
“Биһиги кылааспытыгар 10 буолан үөрэнэбит. Сотору саҥа, киэҥ оскуолаҕа үөрэнэрбититтэн олус үөрэбит. Билигин нэһилиэк аллараа өттүгэр баар мас, эргэ дьиэҕэ үөрэнэбит. Оскуолабыт аҥаара саахалланар туруктаах буолан сабыллан турар, сотору көтүрүөхтээхтэр. Оскуола тутуутун бастакы сыбаайатын Ил Дархаммыт Айсен Сергеевич түһэрбититтэн үөрэбин”, — диэн Абаҕа 8-с кылааһын үөрэнээччитэ Виолетта Строева үөрүүтүн үллэстэр.
Саҥа оскуолаҕа оҕо үөрэнэригэр усулуобуйа барыта олохтонуоҕа, аныгы тэрилинэн хааччыллыбыт кылаастар, көмпүүтэр кылааһа, аактабай саала, бибилэтиэкэ, остолобуой, аһылык астыыр блок барыта баар буолуоҕа.
СӨ Ил Дарханын уонна СӨ Бырабыыталыстыбатын пресс-сулууспата.
Мария ВАСИЛЬЕВА хаартыскаҕа түһэриилэрэ.