Амма өрүскэ уу таһыма үрдүү турар. Ыам ыйын 9 күнүн күнүс 14 чаастааҕы чахчынан, муус аллараа кырыыта Чурапчы Мындаҕаайытыгар тиийбит.
edersaas.ru
Уу таһыма 1022 см (кутталлаах таһым 1350см). Оттон көмүөл үөһээ кырыыта Амма Өнньүөһүгэр баар. Муус хойуутук устарын туһунан ЫБММ Саха сиринээҕи управлениетын пресс-сулууспата иһитиннэрдэ.
Үsia.ru сайтка Быыһыыр сулууспа начаалынньыгын солбуйааччы Василий Тарскай иһитиннэрбитинэн, Амма өрүс халааннаан Чурапчы улууһун Мындаҕаайытын уонна Мырылатын уу ылыан сөп.
Билигин Мындаҕаайылар малларын-салларын атын сиргэ таһан эрэллэр.
Уу ылыан сөптөөх сиригэр олорор дьон сааскы халаан уутуттан сэрэхтээх буолалларыгар, сүөһүлэрин-астарын үрдүк сиргэ таһааралларыгар, малларын-салларын уу ылбатын курдук дьаһаналларыгар ыҥырар. Өрүскэ уу таһымын кэтии сылдьан куттал суоһаатаҕына анал эвакуационнай пууннарга көһөн биэрэллэригэр, сааскы көтөрү бултааһын болдьоҕо аһыллыбытынан, булчуттартан уонна балыксыттартан ууттан сэрэхтээх буолалларыгар, өрүс арыыларыгар киирбэттэригэр сүбэлиир.
Хаартыска: ЯСИА
Биһ. корр., edersaas.ru