Аммаҕа улууһугар Софья Александрова бэрэссэдээтэллээх оройуон мунньаҕын дьокутааттара коронавируһу бохсууга бэйэлэрин тустаах кылааттарын киллэрдилэр.
edersaas.ru
Ол курдук, кинилэр тус бэйэлэрин ааттарыттан 36 тыһ. солк. сэртипикээти улуустааҕы киин балыыһа кылаабынай бырааһыгар Михаил Архиповка туттардылар.
Улуус дьаһалтатын пресс-сулууспата иһитиннэрбитинэн, бу көмө харчы эмчиттэр тус харыстанар тэриллэрин атыылаһыыга туттуллуоҕа.
— Хас биирдии киһи сэбиргэхтэтэн ыалдьыы дьаҥын бохсууга тус кылаатын киллэриэн сөп. Былаас уонна бэйэни салайыныы уорганнара, Амма улууһун олохтоохторо бука бары күүспүтүн түмтэхпитинэ эрэ коронавируһу кыайыахпыт. Ол эбэтэр, хас биирдиибит ирдэбили толоруох, дьиэҕэ олоруох, бэйэбитин уонна чугас дьоммутун харыстыах тустаахпыт, — диэн ыҥырда мэдиссиинэ наукатын хандьыдаата Софья Александрова.
Ити курдук Амма улууһун дьокутааттара былаас бары уорганнарын дьокутааттарыгар бэртээхэй холобуру көрдөрдүлэр.
Елена ПОТОЦКАЯ, «Саха сирэ» хаһыат, edersaas.ru
Хаартыска: «Амма улууһа (оройуона)» МТ саайтыттан