Бу бырааһынньык күннэри баттаһа Амма улууһун хаһаайыстыбаларыгар түөрт тиэхиньикэ тиэрдилиннэ.
edersaas.ru
Улуус дьаһалтата араас судаарыстыбаннай бырагыраамаларга көхтөөхтүк кыттар, бэйэтин бүддьүөтүттэн хос үбүлээһини оҥорор. Ол курдук, «Сиртэн үүнээйини ылыыны сайыннарыы» бырагыраама чэрчитинэн, ааспыт үс сыл устатыгар 140 км усталаах бүтэй тутулунна, сиилэһи угар алта траншея оҥоһулунна, быраҕыллан сыппыт 1315 гектар бааһына чөлүгэр түһэрилиннэ итиэннэ 45 тыа хаһаайыстыбатын тиэхиньикэтэ ылылынна.
Быйыл «Бөтүҥ» кэпэрэтиип уу баһар массыынаны, «Амма» кэпэрэтип үүт таһар массыынаны, «Болугур» уонна «Соморсун» кэпэрэтииптэр тыраахтар ылымыттара бар дьон үөрүүтүн үрдэтэн, бу күннэргэ аҕалылынна.
Саҥа тиэхиньикэлэр күлүүстэрин тылын улуус баһылыга Николай Архипов үөрүүлээх быһыыга-майгыга туттартаата. Мантан сайын тыраахтарга холбонор 28 тэрил кэлиэхтээх. Ол барыта тэрээһиннээх хаһаайыстыбаларга бэриллиэҕэ.
Амма улууһа – өрөспүүбүлүкэ үрдүнэн саамай элбэх ыһыылаах, онон үлэ тиэхиньикэтин саҥардыыга күүскэ үлэлиир. «Сиртэн үүнээйини ылыыны сайыннарыы» бырагыраамата үлэлиэҕиттэн, улуус дьаһалтата бэйэтин бүддьүөтүттэн 25 мөл. солк. көрдө! Бу туһунан Амма улууһун дьаһалтата иһитиннэрдэ.
Раиса Сибирякова, «Саха сирэ» хаһыат, edersaas.ru