Амма улууһун Эмис нэһилиэгин Олом Күөл учаастагар саха боруодалаах ньирэйдэр төрөөтүлэр.
«Наахара» КФХ бэрэссэдээтэлэ Егор Кузьмин этэринэн, бу хаартыскаҕа көстөр куп-кугас ньирэйдэр улааттахтарына хап-хара буолуохтара.
Саха сиригэр саха боруода сүөһүтэ 1660-тан эрэ тахса ахсааннаах. Саха боруодатын иитиинэн 11 улууска дьарыктаналлар – Аммаҕа, Намҥа, Горнайга, Эдьигээҥҥэ, Мэҥэ Хаҥаласка, Өймөкөөҥҥө, Сунтаарга, Тааттаҕа, Хаҥаласка, Чурапчыга уонна Эбээн-Бытантайга.
Егор Николаевич ньирэйдэрин таптаан биллэр мультфильм персонажтарын курдук таптаан «мимишкалар» диэн ааттыыр. Инстаграм ситимигэр страницатыгар оннук ааттаан дьон көрүүтүгэр таһаарда.
ЫСПЫРААПКА
Олом Күөл учаастак Эмис нэһилиэгиттэн илин диэки 25 км тэйиччи сытар. Кузьминнар дьиэ кэргэнинэн 1999 сылтан саха сүөһүлэрин иитэллэр. Бу үлэни урут ыал аҕа баһылыга Николай Егорович Кузьмин саҕалаабыта. Кини дьыалатын билигин улахан уола Егор Николаевич Кузьмин салгыыр.