От ыйын 3-8 күннэригэр Аммаҕа Саха сирин норуоттарын спортивнай оонньуулара ыытыллаллар. Манна спорт 16 көрүҥэр 2392 спортсмен күрэхтэһиэҕэ.
Спорт миниистирэ Иннокентий Григорьев, Амма баһылыга Николай Архипов, сүрүн судьуйа Альберт Трофимов кыттыылаах пресс-кэмпириэнсийэ буолла. Арассыыйа категориялаах судьуйа Альберт Трофимов иһитиннэрбитинэн, уопсайа күрэхтэһиини 250 судьуйа сыаналыаҕа, 26 хамаанда регистрацияны ааспыт, аҕыс хамаанда айаннаан иһэр эбит.
Бастакы күҥҥэ баскетболга, волейболга, мини-футболга, олорон эрэ волейболга күрэхтэһиилэр саҕаланнылар. Оттон буоксаҕа ыйааһыннаныы, сэрэбиэй уонна түмүккэ судьуйалар уопсай мунньахтара буолла.
Амма улууһун баһылыга Николай Архипов:
«Амма дьоно-сэргэтэ бу оонньуулары кэтэспитэ ыраатта. Биһиги улууспутугар 1987 сыллаахха бүтэһигин улахан спортивнай тэрээһин диэн «Манчаары оонньуулара» ыытыллыбыттара. 2014 сыллаахха оччотооҕу Ил Дархан Егор Борисов ыйааҕынан Аммаҕа спартакиада буолар диэн быһаарыллыбыта. Күрэхтэһиибит бастакы күнтэн тыҥааһыннаахтык саҕаланна. Спартакиадаҕа уопсайа 2392 спортсмен кыттара күүтүллэр. Олохтоохтор саамай астынарбыт диэн саҥа эбийиэктэр үлэҕэ киирдилэр — стадион, манеж, спортивнай саалалар», — диэн санаатын эттэ.
Сарсыҥҥыттан көрүҥнэринэн күрэхтэһиилэр бары саҕаланаллар.
Айтана Аммосова, edersaas.ru