Аммаҕа предпринимателлэр түмүстүлэр

Ааптар: 
Бөлөххө киир:

Амма улууһугар предпринимателлэр пуорумнара буолан ааста.

«Дьоҕус биисинэс эйгэтигэр туризмы сайыннарыы» диэн предпринимателлэр пуорумнара «Олимпик» лааҕырга ыытылынна. Туһалаах тэрээһин СӨ Урбаан, эргиэн уонна туризм министиэристибэтин өйөбүлүнэн «Мин биисинэһим» киин, улуустааҕы биисинэс-инкубатор көҕүлээһиннэринэн тэрилиннэ.
Дьыалабыай көрсүһүүгэ тоҕус улуустан уонна Дьокуускай куораттан түмүстүлэр. Пуорум спикердэрэ СӨ Урбааҥҥа, эргиэҥҥэ уонна туризмҥа миниистирэ Тимур Ханды, АРТиТМ ГАУ генеральнай дириэктэрэ Дмитрий Громов, Амма улууһун баһылыга Николай Архипов.
«Өрөспүүбүлүкэҕэ туризмы сайыннарыыга улахан болҕомто ууруллар. Бу тэрээһин түмүгүнэн саҥа, сонун санаалар, этиилэр киллэриллиэхтэрэ, улууска туһааннаан сонун көрүүлэр, бу эйгэҕэ саҥа бырайыактар үөскээн тахсыахтара«, — диэн этэр миниистир.
Түһүлгэҕэ мустубуттар эрэгийиэҥҥэ туризмы сайыннарыыга туһуламмыт түөрт араас хайысханан үлэлээтилэр. Эрэгийиэҥҥэ туризмы тэрийиигэ туох уратылар баалларын, бу хайысхаҕа үлэни тэрийии туһунан дьүүллэстилэр, санааларын үллэһиннилэр. Маны таһынан, «Амма» туристскай-рекреационнай кластер бырайыагын билиһиннэрдилэр.
Тэрээһин кыттыылаахтара икки хамаанданан арахсан хас да чаас устатыгар бырайыак оҥордулар. Амма улууһун хамаандата «Эхо гражданской войны» билиини-көрүүнү хаҥатар, историяны сэһэргиир бырайыагы  билиһиннэрдэ. Манна туристар 142 км араас көлөнөн, ол иһигэр байдаарканан, бэлисипиэтинэн, катамараанынан айанныахтаахтар.
Маны сэргэ, араас маастар-кылаастар ыытылыннылар. «ИнЯкутия» ХЭУо генеральнай дириэктэрэ Михаил Местников уунан айанныырга туристическай өҥөнү тэрийии туһунан билиһиннэрдэ. Кейтериҥҥэ маастар-кылааһы Анна Чернова ыытта. Пуорум кыттыылаахтара кутааҕа балыктан бүлүүдэлэри хайдах бэлэмнииргэ үөрэннилэр. Атласовтар уһаайбаларыттан бренд-шефт Николай Атласов сүбэ-ама арааһын биэрдэ.
Түмүккэ пленарнай сиэссийэҕэ өрөспүүбүлүкэ салалтатыттан, олохтоох дьаһалтаттан, биисинэс эйгэтиттэн, урбаанньыттар уопсастыбаннай түмсүүлэриттэн бэрэстэбиитэллэр кытыннылар. Пуорум предпринимателлэргэ тирээн турар боппуруоһу дьүүллэһэргэ, саҥа кыаҕы арыйарга, үлэҕэ үөрүйэҕи атастаһарга көмөлөөҕө, тирэх буолара бэлиэтэннэ, резолюция ылылынна. Бу эрэгийиэҥҥэ туризмы сайыннарарга көмөлөөх буолуоҕар эрэнэллэрин биллэрдилэр.
+1
0
+1
0
+1
0
+1
0
+1
0
+1
0
+1
0