Аммаҕа Прасковья Емельянова аатынан Бочуоттаах бэлиэни актыбыыс ийэлэргэ туттарыахтара
Бу күннэргэ Ийэ сылыгар Амма улууһугар Прасковья Емельянова аатынан Бочуоттаах бэлиэни бигэргэттилэр.
Сыл аайы бу бэлиэни бастыҥ уопсастыбанньык-ийэлэргэ туттарыахтара. СӨ норуотун хаһаайыстыбатын үтүөлээх үлэһитэ, өрөспүүбүлүкэ муниципальнай сулууспатын туйгуна, Амма улууһун Бочуоттаах гражданина, биллиилээх судаарыстыбаннай уонна уопсастыбаннай диэйэтэл, убаастанар салайааччы Прасковья Ивановна Емельяноваҕа анаммыт кэмпириэнсийэҕэ кини аатынан Ийэ искибиэрин тутуу туһунан кэпсэттилэр.
— Ийэ дойдутугар уһулуччу бэриниилээх буолуу холобурун көрдөрбүт Прасковья Емельянова сырдык аатын үйэтитэр соруктаахпыт. Кини бу күн сириттэн суох буолбута быйыл үһүс сыла. Улуус уонна өрөспүүбүлүкэ социальнай- экэнэмиичэскэй сайдыытыгар сүҥкэн кылаатын киллэрбит киһи туһунан “Суолдьут сулус буолан сырдыгынан сыдьаайар”, “Сырдык ыра санаалах саха Далбар Хотуна”, “Эдьиийбит туһунан иһирэх тылынан”, “П.И.Емельянова – дьахтар, ийэ, дьокутаат” уо.д.а бэрт интэриэһинэй дакылааттары иһиттибит. Прасковья Емельянова биир дойдулаахтарын уйгуларын туһугар олоҕун анаабытын туһунан дириҥ ис хоһоонноох кэпсэтии буолла, — диэн бэлиэтээтэ улуус баһылыга Николай Архипов.
— Биһиги дьүөгэбит, кэллиэгэбит, Амма улууһун киэн туттар киһитин чиэстээн, аатын үйэтитэн, Прасковья Емельянова аатынан Бочуоттаах бэлиэни оҥоттордубут. Бу бэлиэни сыл аайы улуус дьахталларын хамсааһынын бастыҥ актыбыыстарыгар Ийэ күнүгэр уонна дьахталлар сэбиэттэрэ тэрийэр суолталаах тэрээһиннэригэр туттарыахпыт. Маны таһынан, оҕону иитиигэ уһулуччу ситиһиилээх ыалларга Прасковья Емельянова аатынан анал бириэмийэни аныахпыт. Прасковья Ивановна уонна Иван Николаевич Емельяновтарга аналлаах “Емельяновскай ааҕыылары” тэрийэхпит, — диэн Дьахталлар улуустааҕы сэбиэттэрин салайааччыта Софья Александрова санаатын үллэһиннэ.
Бу туһунан улуустааҕы дьаһалта инстаграм сирэйигэр сырдаттылар.
Ити курдук, Амма улууһугар Ийэ сылыгар анаммыт атын улуустарга уонна нэһилиэктэргэ холобур буолар бэртээхэй сонун сүүрээн олоххо киирдэ.
Елена ПОТОЦКАЯ, “Саха сирэ” хаһыат, edersaas.ru
Хаартыска — Амма улууһун дьаһалтатын инстаграмыттан.