Бэҕэһээ буолбут бырабыыталыстыба ыксаллаах быһыыга-майгыга хамыыһыйатын мунньаҕар өрөспүүбүлүкэ Ил Дархана Егор Борисов Амма улууһун салалтатыгар туһаайан Саха сирин норуоттарын Спортивнай оонньууларын ыытыы туһунан тиэмэни күүркэппэттэригэр эттэ.
Ыам ыйын 13 күнүгэр өрөспүүбүлүкэ Ил Дархана Егор Борисов бырабыыталыстыба ыксаллаах быһыыга-майгыга хамыыһыйатын иккис мунньаҕын салайан ыытта. Онно хамыыһыйа чилиэннэрэ өрүстэргэ көмүөл ааһыытыгар туох үлэни тэрийэллэрин отчуоттаатылар. Билэргит курдук, Амма улууһугар түөрт нэһилиэнньэлээх пуун: Чапчылҕан, Абаҕа, Мээндигэ уонна Амма халааҥҥа барда. Барыта 196 олорор дьиэни, 300 тиэргэни уу ылла.
Мунньахха өрөспүүбүлүкэ баһылыга Амма улууһун салалтатыгар туһаайан Саха сирин норуоттарын Спортивнай оонньууларын ыытыы туһунан тиэмэни күүркэппэттэригэр эттэ. Өрөспүүбүлүкэҕэ маннык сабыытыйалар буола турдахтарына, биһиги бырааһынньыктыырбыт, күрэхтэһиилэри ыытарбыт сиэрэ суох быһыынан буолуо диэн ыйан туран, Егор Афанасьевич Оонньуулар Аммаҕа ыытыллыахтара, ол эрэн быйыл буолбатах диэтэ.
Ил Дархан сайыҥҥы ыйдарга чөлүгэр түһэрии үлэтинэн: дьиэлэри куурдуунан, өрөмүөннээһининэн, суоллары оҥоруунан ылсан дьарыктанарга эттэ. Чөлүгэр түһэрии үлэтэ Аммаҕа эрэ буолбакка, атын улуустарга эмиэ барыаҕын бэлиэтээтэ.
Санатан эттэххэ, Саха сирин норуоттарын VII Спортивнай оонньуулара Аммаҕа атырдьах ыйын 1-5 күннэригэр ыытыллыахтаахтара.
Роман ПОПОВ, “Саха сирэ” хаһыат, edersaas.ru
Хаартыскаларга: Аммаҕа тутулла турар стадион тас көстүүтэ.